Summary -

• नालासोपाऱ्यात १० लाखांहून अधिक रोकड जप्त

• मध्यरात्री अडीच वाजता पोलिसांची मोठी कारवाई

• भाजपकडून मतदारांना पैसे वाटपाचा आरोप

• या प्रकरणी दोन दुचाकीसह दोघांना अटक केली

महानगर पालिका निवडणुकीच्या रणधुमाळीत नालासोपाऱ्यात मोठी कारवाई करण्यात आली आहे. याठिकाणी तब्बल १० लाखांची रोकड जप्त करण्यात आली आहे. भाजपकडून मतदारांना पैसे वाटण्यासाठी घेऊन जात असल्याचा आरोप करण्यात आला आहे. दुकाकीच्या डिक्कीमधून दोघे जण हे पैसे घेऊन जात होते. पोलिसांनी दोघांविरोधात गुन्हा दाखल करत त्यांना अटक केली. मध्यरात्री अडीच वाजताच्या सुमारास ही कारवाई करण्यात आली.

मिळालेल्या माहितीनुसार, मतदारांना पैसे वाटप करण्यासाठी नेताना नालासोपाऱ्यात पोलिसांनी मोठी कारवाई केली. १० लाख ९ हजार रुपयांची रोख रक्कम पोलिसांनी ताब्यात घेतली. दोघे जण पैशांची वेगवेगळे पॉकिटे, एका प्लॅस्टिक पिशवीत टाकून दुचाकीच्या डिक्कीतून घेऊन जात होते. या दोघांना पोलिसांनी पेल्हार ब्रिजजवळ मध्यरात्री अडीच वाजता पकडले. त्यांची तपासणी केली असता तब्बल १० लाखांची रोख रक्कम त्यांच्याकडे सापडली.

भाजपकडून हे पैसे मतदारांना वाटप करण्यासाठी नेण्यात येत होते असा आरोप करण्यात आला आहे. १० लाख ९ हजार रुपयांची रोख रक्कम दोन दुचाकीमधून घेऊन जात होते. याप्रकरणी पेल्हार पोलिस ठाण्यात दोघांविरोधात कलम बीएमएस १७३ अंतर्गत मतदारांना लाच दिल्याप्रकरणी गुन्हा दाखल केला. पेल्हार पोलिसांनी दोघांनाही अटक केली. या घटनेमुळे नालासोपाऱ्यात एकच खळबळ उडाली असून राजकीय वातावरण तापले आहे.

दरम्यान, बृहन्मुंबई महानगरपालिका निवडणुकीपूर्वी आदर्श आचारसंहिता लागू झाल्यामुळे गेल्या २० दिवसांत निवडणूक गस्त घालण्याच्या मोहिमेदरम्यान महापालिकेने आतापर्यंत ३.१ कोटी रुपये रोख रक्कम जप्त केली. तर ४४ कोटी रुपये किंमतीचे ५५ किलो वजनाचे अमली पदार्थ जप्त करण्यात आले आहेत. ८.३ लाख रुपये किंमतीची १२३७ लिटर दारू जप्त केली आहे. महापालिकेने निवडणुकीशी संबंधित एकूण १६ अदखलपात्र गुन्हे दाखल केले आहेत. तर १३ दखलपात्र गुन्हे दाखल केले आहेत. मुंबई महानगर पालिकेने सोमवारी पत्रकार परिषदेत ही माहिती दिली.