संघर्ष गांगुर्डे, साम टीव्ही

डोंबिवली पश्चिम येथील रेतिबंदर रोडवरील रेल्वे क्रॉसिंग क्रमांक १ येथे प्रस्तावित रेल्वे उड्डाणपूलाच्या कामासाठी कल्याण डोंबिवली महानगरपालिका मार्फत निविदा जाहीर करण्यात आली आहे. या निर्णयामुळे डोंबिवलीकरांच्या अनेक वर्षांपासून प्रलंबित असलेल्या मागणीला अखेर गती मिळाली आहे. डोंबिवली पश्चिम आणि पूर्व भागांना जोडणारा हा मार्ग अत्यंत महत्त्वाचा असून सध्या रेल्वे फाटकामुळे येथे वारंवार वाहतूक कोंडी निर्माण होते. विशेषतः सकाळ संध्याकाळच्या गर्दीच्या वेळेत नागरिकांना दीर्घकाळ थांबावे लागते. याचा परिणाम केवळ दैनंदिन प्रवासावरच नाही, तर रुग्णवाहिका आणि इतर आपत्कालीन सेवांवरही होत असल्याचे चित्र आहे.

या पार्श्वभूमीवर उड्डाणपूल उभारणीची मागणी अनेक वर्षांपासून होत होती. या प्रकल्पासाठी आमदार रवींद्र चव्हाण तसेच नगरसेवक दिपेश पुंडलीक म्हात्रे यांनी सातत्याने पाठपुरावा केला. त्यांच्या प्रयत्नांमुळे हा विषय प्रशासनाच्या पातळीवर प्रभावीपणे पुढे आला. विशेष म्हणजे, सुरुवातीला हा उड्डाणपूल दोन लेनचा प्रस्तावित होता. मात्र दीपेश म्हात्रे यांच्या पाठपुराव्यानंतर आता हा पूल चार लेनचा करण्यात येणार आहे. त्यामुळे भविष्यातील वाढती वाहतूक लक्षात घेऊन अधिक सक्षम रस्तेव्यवस्था उपलब्ध होणार आहे.

प्रकल्प पूर्ण करण्यासाठी सुमारे २४ महिन्यांचा कालावधी निश्चित करण्यात आला आहे.हा उड्डाणपूल पूर्ण झाल्यानंतर वाहतूक कोंडी मोठ्या प्रमाणात कमी होण्याची अपेक्षा आहे. प्रवास अधिक जलद आणि सुरक्षित होईल, तसेच नागरिकांचा वेळ आणि इंधनाचीही बचत होणार आहे. एकूणच, डोंबिवली शहराच्या पायाभूत सुविधांमध्ये भरीव सुधारणा घडवून आणणारा हा प्रकल्प ठरणार असून शहराच्या विकासाला मोठी चालना मिळेल, असा विश्वास नगरसेवक दीपेश म्हात्रे यांच्याकडून व्यक्त केला जात आहे.