अभिजित देशमुख, साम टीव्ही, प्रतिनिधी

घरगडी बनून साथीदारांसह घरामधील लाखोंचा मौल्यवान ऐवज लंपास करणाऱ्या चार जणांच्या टोळीला विष्णू नगर पोलिसांनी जेरबंद केलं आहे. डोंबिवलीत घर काम करणाऱ्या घरगडीने आपल्या मेहूणा आणि अन्य दोन साथीदारांसोबत चोरी केली. विष्णूनगर पोलिसांनी रिक्षा चालकाच्या दिलेल्या माहितीच्या आधारे तपास करत तीन चोरट्यांना अटक केली आहे.

पोलिसांनी आरोपींकडून 15 लाख रुपयांचा मुद्देमाल हस्तगत केला. लील बहादूर कामी, टेकबहादूर शाही, मनबहादूर शाही, असं अटक करणाऱ्या आरोपींची नावे आहेत. तर त्यांचा साथीदार सागर विश्वकर्मा पसार असून पोलीस त्याचा शोध घेत आहेत. हे चौघे मूळचे नेपाळचे आहेत. लील बहादूर या टोळीचा मुख्य सूत्रधार आहे. त्याच्या विरोधात वसई, तेलंगणामध्ये घरफोडीचे गुन्हे दाखल आहेत. त्याने घरफोडी प्रकरणी याआधी दीड वर्ष शिक्षा भोगली आहे.

मिळालेल्या माहितीनुसार, डोंबिवली पश्चिमेतील विष्णूनगर पोलीस ठाण्याच्या हद्दीत राहणारे कुंदन म्हात्रे यांच्या घरात 27 जुलै रोजी संध्याकाळी चोरी झाली. घरातील महागडे दागिने काही रोकड, असा एकूण 15 लाखाहून अधिक मुद्देमाल घेऊन चोरटे पसार झाले हाेते. या प्रकरणात विष्णूनगर पोलिस ठाण्यात गुन्हा दाखल करण्यात आला होता. डीपीसी सचिन गुंजाळ, वरिष्ठ पोलिस निरिक्षक संजय पवार यांच्या मार्गदर्शनाखाली पोलिस अधिकारी दिपविजय भवार, पोलिस अधिकारी गहीनाथ गमे, सचिन लोखंडे यांच्या पथकाने या प्रकरणाचा तपास सुरु केला.

चोरीची घटना घडल्यानंतर कुंदन यांच्या घरात काम करणारा घरगडी सागर विश्वकर्मा उर्फ थापा हा पसार झाला होता. पोलिसांना सागरवर संशय होता. पोलीस सागरचा शोध घेत होते. पोलिसांनी आजूबाजूच्या परिसरातील सीसीटीव्ही तपासले. चोरीची घटना घडली त्यादिवशी रात्री सागर एक रिक्षा पकडून शीळ फाट्याच्या दिशेने गेल्याचे सीसीटीव्हीत दिसले. पोलिसांचे पथक शीळ फाट्याला पोहचले. शीळ फाट्याच्या रिक्षा स्टँडवर सागरचा फोटो दाखवत पोलिसांनी विचारपूस केली.

त्यावेळी एका रिक्षा चालकाने या प्रवाशाला नवी मुंबईतील कामोठे येथे सोडल्याचे सांगितले. रिक्षाचालकाने दिलेला माहितीनुसार, पोलीस त्याठिकाणी पोहचले. कामोठे परिसरातील सीसीटीव्ही तपासणी सीसीटीव्हीच्या मदतीने सागर ज्या घरात गेला होता. ते घर शोधले. त्या घरात राहणाऱ्या लील बहादूर कामी याच्याकडे विचारपूस केली असता त्याने उडवाउडवीची उत्तरे दिली.

पोलिसांना संशय आल्यानंतर त्याला पोलीस खाक्या दाखवला असता तो सागरचा मेव्हणा असल्याची माहिती मिळाली. पोलिसांनी लील बहादूरला ताब्यात घेत कसून चौकशी केली असता त्याने सागरच्या मदतीने साथीदारांसह मालकाच्या घरात चोरी केल्याचे कबूल केले.