संघर्ष गांगुर्डे, साम टीव्ही

Dombivli : खवय्यांच्या गर्दीने नेहमी गजबजलेल्या डोंबिवली पश्चिम भागातून एक अत्यंत धक्कादायक आणि घृणास्पद प्रकार समोर आलाय. येथील प्रसिद्ध ‘गजानन वडापाव’ विक्रेत्याच्या चटणीत चक्क अळ्या आढळल्याची घटना घडली आहे. या घटनेने परिसरात एकच खळबळ उडाली आहे.

​डोंबिवली पश्चिमेकडील हा प्रकार उघडकीस आल्यानंतर नागरिकांमध्ये तीव्र संतापाची लाट उसळली आहे. स्थानिक भाजी विक्रेत्या महिलांनी या प्रसिद्ध दुकानातून वडापाव खरेदी केला. वडापाव खाताना त्यामधील चटणी नीट पाहिली. त्यावेळी त्यांना त्यात हालचाल करणाऱ्या अळ्या दिसल्या.

दुकानातील हा प्रकार पाहून भाजी विक्रेत्या महिला ग्राहकांनी तात्काळ हा वडापाव टाकून देत दुकानात गोंधळ घातला. या संतापजनक घटनेची माहिती परिसरात दिली. यावेळी परिसरात उपस्थित असलेल्या समाजसेविका काशीबाई जाधव यांनी घटनेचे गांभीर्य ओळखले. त्यांनी तातडीने ही बाब कल्याण-डोंबिवली महानगरपालिकेचे 'ह' प्रभाग अधिकारी राजेश सावंत यांच्या निदर्शनास आणून दिली.

राजेश सावंत यांनीही कोणत्याही प्रकारची दिरंगाई न करता तात्काळ या स्थळाची पाहणी केली. पाहणीत प्रकार सत्य असल्याचे लक्षात आले. त्यांनी आरोग्य विभागाला सूचित करून संबंधित 'गजानन वडापाव'चे दुकान त्वरित बंद करण्याचे आदेश दिले. सध्या अन्या आणि आरोग्य विभाकडून संबंधित खाद्याचे नमुने नेत तपासणी करण्यात येत आहे. या तपासणी नंतर योग्य करवाई करण्यात येणार असल्याचे अधिकाऱ्यांनी सागितले.