अभिजीत देशमुख

Dombivli Crime News:

डोंबिवलीतून धक्कादायक घटना उघडकीस आली आहे. डोंबिवलीत एका नऊ वर्षीय गतिमंद मुलीची तिच्या दारुड्या बापाने हत्या केल्याची घटना घडली आहे. या प्रकरणी मानपाडा पोलिसांत ठाण्यात गुन्हा नोंद करण्यात आला आहे. (Latest Marathi News)

मिळालेल्या माहितीनुसार, डोंबिवलीत एका नऊ वर्षीय गतिमंद मुलीची तिच्याच दारुड्या वडिलांनी ओढणीने गळा आवळून हत्या केल्याची धक्कादायक घटना घडली आहे. मनोज कुमार अग्रहरी असे या निर्दयी वडिलाचे नाव आहे.

मानपाडा पोलीस ठाण्यात मनोजकुमार विरोधात गुन्हा दाखल करण्यात आला आहे. तसेच आरोपीला अटक करण्यात आली आहे. या मुलीच्या आजारपणाला कंटाळून दारुड्या मनोज कुमार याने मुलीची हत्या केल्याची कबुली दिली आहे.

नेमकं काय घडलं?

डोंबिवली पूर्वेतील मानपाडा माणगाव येथे म्हात्रे चाळीत मनोज कुमार त्याची पत्नी लीलावती व त्यांच्या चार मुलीसह राहत होते. त्याच्या चार मुलींमधील एक मुलगी गतिमंद होती.

मनोज कुमार मजुरी करत आपल्या कुटुंबाचा उदरनिर्वाह करत होता. त्याला दारूचे व्यसन होते. दारू पिऊन तो पत्नीसह मुलींना देखील मारहाण करायचा. आठवडाभरापूर्वीच मनोज कुमार याने आपल्या गतिमंद मुलीला बेदम मारहाण केली होती.

अवघ्या काही तासांत आरोपीला अटक

काल सायंकाळच्या सुमारास मनोज कुमार दारू पिऊन घरी आला. त्याने त्याच्या गतिमंद मुलीला मारहाण केली. त्यानंतर ओढणीने गळा आवळून तिची हत्या केली, त्यानंतर मनोज कुमार तिथून पसार झाला.

काही वेळाने मनोज कुमार यांची पत्नी घरी आल्यानंतर तिला आपल्या मुलीचे हत्या झाल्याचं लक्षात आलं. त्यांनी या प्रकरणी मानपाडा पोलीस ठाण्यात तक्रार नोंदवली. पोलिसांनी निर्दयी मनोज कुमारचा शोध सुरू केला. त्यानंतर अवघ्या काही तासात मनोज कुमार याला मानपाडा पोलिसांनी बेड्या ठोकल्या आहेत.