दिवा रेल्वेस्थानकातून धक्कादायक बातमी समोर आली आहे. एका ३० वर्षीय व्यक्तीने दिवा रेल्वेस्थानकात येणाऱ्या मालगाडीसमोर एका महिलेला ढकलून दिले आहे. या घटनेत महिलेचा जागीच मृत्यू झाला.शुक्रवारी पहाटे ही घटना घडली असून याप्रकरणी नराधम राजन शिवनारायण सिंह याला दिवा पोलिसांनी ताब्यात घेतले आहे.

मिळालेल्या माहितीनुसार, शुक्रवारी पहाटे ५ वाजता दिवा येथील रहिवासी असलेला आरोपी राजन शिवनारायण सिंह हा बराच वेळ प्लॅटफॉर्मवर महिलेचा पाठलाग करत होता. आरोपीच्या चुकीच्या वागण्याचा महिलेला संशय आल्याने त्याच्या वागण्याला महिलेने विरोध केला. स्थानकावर उपस्थित असलेल्या स्वच्छता कर्मचारी आणि प्रत्यक्षदर्शींनी महिलेचा ओरडण्याचा आवाज ऐकला आणि ते प्लॅटफॉर्मवर धावले. जिथे त्यांनी दोघांमध्ये वाद सुरु असल्याचे पाहिले. जोरदार बाचाबाचीदरम्यान, आरोपी राजनने महिलेची मान धरून मालगाडी समोर ढकलले. मालगाडीच्या भरधाव धडकेत पीडित महिलेचा मृत्यू झाला आहे.

त्यानंतर आरोपीने रेल्वे रुळांवरून पळून जाण्याचा प्रयत्न केला, परंतु दिवा रेल्वे स्थानकावर तैनात असलेले पोलीस कॉन्स्टेबल सागर शिंदे यांनी त्याचा पाठलाग करून त्याला पकडले. त्यांनी आरोपीला ठाणे सरकारी रेल्वे पोलिस (जीआरपी) स्टेशनवर नेले, जिथे त्याच्यावर भारतीय न्याय संहिताच्या संबंधित कलमांखाली खून आणि इतर सहाय्यक आरोपांचा गुन्हा दाखल करण्यात आला. शुक्रवारी त्याला न्यायिक दंडाधिकाऱ्यांसमोर हजर करण्यात आले आणि पाच दिवसांची पोलिस कोठडी सुनावण्यात आली. दरम्यान अद्यापही या महिलेची ओळख पटली नसून पोलीस याचा तपास करत आहेत.

जीआरपीच्या एका वरिष्ठ अधिकाऱ्याने सांगितले की, "प्राथमिक तपासात असे दिसून आले आहे की आरोपी महिलेला ओळखत नव्हता, ती बेघर असल्याची शक्यता आहे. कारण ती कित्येक रात्र दिवा रेल्वे स्टेशन परिसरात घालवत असे. तसेच पीडितांच्या सामानात पोलिसांना कोणतेही ओळखपत्र सापडलेले नाही आणि तिची ओळख अद्याप पटलेली नाही. आम्ही सीसीटीव्ही फुटेज तपासत आहोत आणि घटनांचा संपूर्ण क्रम एकत्रित करण्यासाठी प्रत्यक्षदर्शींशी बोलत आहोत," असे अधिकाऱ्याने सांगितले.