पुण्यातील दौंडच्या यवतमध्ये दोन गट भिडले. एका तरुणाने सोशल मीडियावर आक्षेपार्ह पोस्ट केल्यानं दोन गटांतील लोक परस्परांशी भिडले. त्यामुळे परिसरात तणाव निर्माण झाला होता. यवतमध्ये काही दुचाकी पेटवून देण्यात आल्या. तर घराचीही तोडफोड केली. या घटनेनंतर पोलीस तिथे पोहोचले. त्यांनी हस्तक्षेप केल्यानं तणाव निवळला आहे. याबाबत मुख्यमंत्री देवेंद्र फडणवीस यांनी प्रतिक्रिया दिली आहे. या घटनेनंतर त्यांनी बेकायदा कृत्य करणाऱ्यांना कडक शब्दांत इशारा दिला आहे.

जमावाला पांगवण्यासाठी लाठीमार

मुख्यमंत्री फडणवीस यांनी सांगितले की, मी आताच या संदर्भात माहिती घेतली. बाहेरच्या व्यक्तीने चुकीच्या पद्धतीने स्टेटस ठेवल्याने हा तणाव निर्माण झाला. लोक रस्त्यावर आले. जमावाला पांगवण्यासाठी काही प्रमाणात लाठीमार करावा लागला.

परिस्थिती नियंत्रणात

यवतमधील परिस्थिती नियंत्रणात आहे. दोन्ही समाजाचे लोक एकत्रित बसले आहेत. हा तणाव निवळण्याचा प्रयत्न आहे. जाणीवपूर्वक काही लोक तणाव निर्माण झाला पाहिजे, अशा प्रकारचे स्टेटस ठेवून किंवा तशा प्रकारच्या घटना घडवताना पाहायला मिळतात. त्यांच्यावर कठोर कारवाई निश्चितपणे केली जाईल, अशा शब्दांत मुख्यमंत्र्यांनी इशारा दिला.

सहन करणार नाही!

यवतमध्ये नुकतीच एक सभा झाली. त्याबाबत वेगवेगळ्या चर्चा सुरू आहेत. याबाबतही मुख्यमंत्री फडणवीसांनी प्रतिक्रिया दिली. सभा झाल्यानंतर असं स्टेटस ठेवण्याची मुभा दिलीय का कुणाला? अशा प्रकारे चुकीच्या पद्धतीने एखाद्या धर्मावर अशी टीका करण्याचा कुणाला अधिकार नाही. त्यामुळे सभेचा आणि या घटनेचा संबंध जोडण्याचे काहीही कारण नाही. सभा झाली म्हणून आम्ही असं केलं हे कुणी म्हणत असेल तर आम्ही सहन करणार नाही, अशी समजही त्यांनी यावेळी दिली.

चौकशी करणार

आता त्या ठिकाणी शांतता आहे. आता हे व्हिडिओ तिथले आहेत की बाहेरचे आहेत हे बघावं लागेल. अनेकदा पाहिलंय की बाहेरचे व्हिडिओ दाखवले जातात. या सगळ्या गोष्टींची चौकशी केली जाईल, असेही मुख्यमंत्र्यांनी सांगितले.

कुणालाही कायदा हातात घ्यायचा अधिकार नाही

यवतच्या घटनेनंतर मुख्यमंत्री फडणवीस यांनी जनतेला शांततेचं आवाहन केले आहे. सगळ्यांनी शांतता ठेवली पाहिजे. कुणीही कायदा हातात घेऊ नका. कुणी बेकायदेशीर कृत्य करत असेल तर पोलीस कारवाई करतील. कुणालाही कायदा हातात घ्यायचा अधिकार नाही, असा इशाराही त्यांनी दिला.