मुंबई : 'फक्त आणि फक्त चर्चेत राहण्यासाठी काँग्रेसच्या नाना पटोले यांनी मोदींचा एकेरी उल्लेख केला, सभागृहातील राजदंड उचलण्याचा प्रयत्न केला', असल्याची टीका राज्याचे उपमुख्यमंत्री एकनाथ शिंदे यांनी केली. 'मोदींवर टीका करून चर्चेत राहता येतं, त्यामुळे 'बाप तो बापही होता हैं', असा टोलाही शिंदेंनी नाना पटोले यांना लगावला. भाजपचे नेते बबनराव लोणीकर यांनी शेतकऱ्यांविषयी केलेल्या वक्तव्यामुळे काँग्रेसचे नेते नाना पटोले आक्रमक झाले. त्यांनी विधानसभा अध्यक्षांचा राजदंड उचलण्याचा प्रयत्न केला. त्यामुळे त्यांना एका दिवसासाठी निलंबित करण्यात आलं. त्यावर एकनाथ शिंदे यांनी प्रतिक्रिया दिली. ते माध्यमांशी बोलत होते.

एकनाथ शिंदे म्हणाले की, 'नाना पटोले हे विधानसभेचे अध्यक्ष राहिले आहेत. त्यांना सभागृहाचे नियम माहिती आहेत. पण ते असं का वागले याची माहिती नाही. त्यांनी राजदंड उचलण्याचा प्रयत्न पण केला. त्यांच्याकडून अशा कृतीची अपेक्षा नव्हती. गेल्या काही दिवसांपासून नाना पटोले हे चर्चेतून बाहेर पडले आहेत. त्यामुळे दिल्लीतील लोकांना दाखवण्यासाठी, चर्चेत राहण्यासाठी त्यांनी हे कृत्य केलं असावं. त्यांचे नेते राहुल गांधी हे परदेशात जाऊन मोदींवर टीका करतात. तसंच नाना पटोले यांनी केलं. पण बाप तो बापही होता हैं', असं शिंदे यावेळी म्हणाले.

कृषिमंत्री माणिकराव कोकाटे आणि भाजप नेते बबनराव लोणीकर यांनी शेतकऱ्यांबाबत केलेल्या वादग्रस्त वक्तव्यावरुन विरोधक सभागृहात आक्रमक झाले. काँग्रेस आमदार नाना पटोलेंनी राजदंड उचलण्याचा प्रयत्न केला. त्यानंतर सभागृहात काही काळ गोंधळाचं वातावरण निर्माण झालं होतं. 'अध्यक्षांच्या अंगावर धावून जाणं योग्य नाही, नाना पटोलेंनी माफी मागितली पाहिजे', अशी मागणी मुख्यमंत्री देवेंद्र फडणवीसांनी केली. यानंतर नाना पटोलेंना एका दिवसासाठी निलंबित करण्यात आलं.