पाहिलंत, महाराष्ट्रात सध्या पारंपरिक लावणीच्या नावाखाली बीभस्त नृत्याचं पेव फुटलंय . मात्र, याच अश्लील डान्समुळे राज्यातील दहीहंडी उत्सव मंडळांवर कारवाईचा बडगा उगारण्यास सुरूवात झालीये. पुण्यात प्रसिद्ध लावणी डान्सर राधा पाटील, मंडळांचे अध्यक्ष आणि आयोजकांवरही गुन्हा दाखल करण्यात आलाय. रंगभूमी प्रयोग परिनिरीक्षण मंडळाचे योग्यता प्रमाणपत्र सादर करण्याची अट असली तरी अश्लील हावभावाचाही उल्लेख गुन्ह्यात करण्यात आलाय.

या दोन्ही घटना पुण्यातल्या असल्या तरी दहिहंडीला मुंबई, ठाणे आणि इतर शहरांमध्ये मोठ्या संख्येनं अश्लील डान्सचे प्रकार सर्रास सुरू होते. त्यामुळे सत्तेत असलेल्या राष्ट्रवादी काँग्रेस चित्रपट व सांस्कृतिक विभागानं यासंदर्भात मुख्यमंत्री देवेंद्र फडणवीसांना पत्र लिहिलंय आणि या सर्व कार्यक्रमांच्या चौकशीची मागणी केलीय. सत्तेत असलेल्या राष्ट्रवादीनंच या सर्व कार्यक्रमांवर आक्षेप घेतलाय. त्यात आता याबाबत पहिला गुन्हा राधा पाटील आणि पुण्यातल्या आयोजकांवर दाखल झालाय.

आता मुंबई आणि ठाण्यात झालेल्या दहिहंडी कार्यक्रमातल्या अश्लील डान्सही या निमित्तानं वादात सापडले आहेत. कारण अनेकांनी यापूर्वीच या कार्यक्रमांवर टीका केली होती. त्यामुळे आता या कारवाईची व्याप्ती वाढवणार का? राजकारण्यांनीच आयोजित केलेल्या या कार्यक्रमांवरही गुन्हा दाखल करण्यात येणार का? याकडे सर्वांचं लक्ष लागलंय.