संजय गडदे, मुंबई

मुंबईतून धक्कादायक बातमी समोर आली आहे. टेलिग्राम अ‍ॅपवर नोकरीचं आमिष दाखवून तब्बल ६ लाख ९ हजार ८८४ रुपयांची फसवणूक करणाऱ्या एका सायबर गुन्हेगाराला ओशिवरा पोलिसांनी तांत्रिक तपासाद्वारे गोवा येथून अटक केली आहे. या प्रकरणाचा छडा लावत पोलिसांनी एका गंभीर सायबर गुन्ह्याचा पर्दाफाश केला. या प्रकरणांत आरोपी असलेल्या अमन पास्कर परमार याला पोलिसांनी ताब्यात घेतलं आहे.

नेमकं काय घडलं ?

तक्रारदार नगानी यांना जून २०२५ मध्ये 'विजय' नावाच्या व्यक्तीने टेलिग्राम अ‍ॅपवरून संपर्क केला होता. विजयने त्यांना एका लिंकवर माहिती भरायला लावली व ऑनलाइन रेस्टॉरंट रेटिंगचं काम देण्याचं आमिष दाखवलं. सुरुवातीला थोडा परतावा मिळाल्याने त्यांनी यावर विश्वास ठेवला. मात्र नंतर बोगस बँक व्यवहाराच्या माध्यमातून त्यांच्याकडून टप्प्याटप्प्याने लाखो रुपये उकळण्यात आले.

नगानी यांच्या तक्रारीवरून मुंबईतील ओशिवरा पोलीस ठाण्यात भारतीय दंड संहिता कलम 318(4), 319(2) BNS आणि माहिती तंत्रज्ञान अधिनियमातील 66(C)(D) अंतर्गत गुन्हा दाखल करण्यात आला. या प्रकरणाचा तपास करताना पोलिसांनी आरोपीने वापरलेलं येस बँकेचं खाते ट्रेस केलं. त्यानंतर त्या खात्यातील व्यवहार, मोबाइल नंबर आणि सीसीटीव्ही फुटेजचं विश्लेषण करण्यात आलं. या तांत्रिक तपासातून आरोपीचा लोकेशन गोव्यातील कांडोलिम परिसरात असल्याचे निष्पन्न झालं.

वरिष्ठ पोलीस अधिकाऱ्यांच्या मार्गदर्शनाखाली पोलीस उपनिरीक्षक शरद देवरे व सायबर पथकाने गोव्यात सर्च ऑपरेशन राबवत मध्य प्रदेशातील मूळ रहिवासी असलेल्या आरोपी अमन पास्कर परमार याला ताब्यात घेतलं. आरोपीला अंधेरी न्यायालयात हजर केले असता ४ ऑगस्टपर्यंत पोलिस कोठडी सुनावण्यात आली आहे.

या यशस्वी कारवाईमुळे पोलिसांची तांत्रिक तपास यंत्रणा आणि सायबर गुन्ह्यांवरील सजगता अधोरेखित झाली आहे. ही कामगिरी व.पो.नि. प्रीतम बाणावली, पो. नि. प्रभात मानकर यांच्या मार्गदर्शनाखाली सायबर पथकातील पो.उ.नि. शरद देवरे, स.फौ. अशोक कोंडे, पो.शि. विक्रम सरनोबत आणि स्वप्नील काकडे यांनी केली.

दरम्यान, पोलिसांनी या फसवणुकीमागे आणखी आरोपी असण्याचा संशय व्यक्त केला असून, या सायबर जाळ्याचे इतर धागेदोरेही लवकरच हाती लागण्याची शक्यता आहे. नागरीकांनी सोशल मीडियावरून मिळणाऱ्या आकर्षक ऑफरच्या आमिषांना बळी न पडता सतर्क राहण्याचे आवाहन पोलिसांकडून करण्यात येत आहे.