विद्येचं माहेरघर असलेल्या पुण्यात सध्या गुन्हेगारी प्रवृत्ती वाढत चालली आहे. हत्या, गोळीबार, चोऱ्यांसारख्या घटना सहज पाहायला मिळत आहे. या घटनांनंतर पुण्याचा बिहार होतोय का प्रश्न नागरिकांना भेडसावत आहे. अशाप्रकारची आणखी एक संतापजनक घटना पुण्यातून समोर आली आहे. बाप लेकाच्या जोडीने मिळून एका महिलेची वीट आणि लाकडी दांडक्याने मारहाण करुन हत्या केली आहे. धक्कदायक म्हणजे या महिलेची हत्या केल्यानंतर तिचा मृतदेह घरातच ठेवण्यात आला. याप्रकरणी पोलिसांनी तपासाची चक्रे वेगाने फिरवत संबंधित आरोपींना ताब्यात घेण्यात आले आहे.

पोलिसांनी दिलेल्या माहितीनुसार, विमानतळ पोलीस ठाण्याच्या हद्दीतील लोहगाव स्मशानभुमी परिसरात एक अनोळखी महिलेचा मृतदेह आढळला होता. या मृतदेहाला ताब्यात घेऊन पोलिसांनी तपास सुरु केला. परिसरातील सीसीटीव्ही तपासले असता लाईट बंद असलेली संशयास्पद रिक्षा दिसुन आली. त्या अनुषंगाने लोहगाव, धानोरी, विश्रांतवाडी आणि येरवडा या भागातील रिक्षा गेलेल्या सीसीटीव्हीची पाहणी करण्यात आली.

तपासात आढळून आलेल्या संशयित रवी रमेश साबळे (वय ३५) आणि रमेश रामचंद्र साबळे (वय ६५) या दोघांना पोलिसांनी ताब्यात घेतलं. या दोघांचीही चौकशी केली असता या दोघांनीही महिलेच्या हत्येची कबुली दिली. आरोपींनी दिलेल्या माहितीनुसार, आरोपी रवी आणि आरोपी रमेश या दोघांनी मिळून महिलेला तीन दिवसांपूर्वी वीट आणि लाकडी दांडक्याने मारहाण करुन तिची हत्या केली. मात्र एवढ्यावरच न थांबता या दोघांनी महिलेचा मृतदेह घरामध्ये लपवुन ठेवला होता.

या दरम्यान तीन ते चार दिवस उलटून गेल्यावर या महिलेच्या मृतदेहाला दुर्गंधी सुटू लागली. शेजाऱ्यांनाही या दुर्गंधीचा त्रास होऊ लागला. त्यामुळे आरोपी रवी आणि रमेश यांनी १८ नोव्हेंबर रोजी पहाटे महिलेचा मृतदेह एका रिक्षामध्ये भरून स्मशानभूमीत फेकला. हा सडलेला मृतदेह पाहून गावकऱ्यांनी पोलिसांना कळवल्याने हा प्रकार उघडकीस आला. दरम्यान या बापलेकाच्या जोडीने या महिलेची हत्या का केली? हे अद्यापही स्पष्ट झालेले नाही. तसेच ही महिला कोण आहे याचा तपास पोलीस करत आहेत.