- सिद्धेश म्हात्रे

नवी मुंबई : आता कुरिअरच्या माध्यमातून गांजाची तस्करी होत असल्याचा प्रकार नवी मुंबईत (navi mumbai) समोर आला आहे. कपडे कुरिअर करायचे असल्याचे सांगत तुर्भे मधील कुरिअर कंपनीत आलेल्या एका व्यक्तीवर संशय आल्याने कुरिअरद्वारे गांजाची तस्करी करण्याचा प्रयत्न फसला. (navi mumbai crime news)

मंगुसिंग राजपूत याची तुर्भेमध्ये कुरिअर एजन्सी आहे. त्याच्याकडे एक तरुण (youth) दोन बॉक्स घेऊन ते नवी दिल्ली व दिमापूर येथे कुरिअर करण्यासाठी आला होता. या तरुणाने दोन्ही बॉक्समध्ये कपडे असल्याचे सांगितले. प्रथम तरुणांकडे ओळखपत्र नसल्याने त्याचे पार्सल स्वीकारण्यात आले नाही तर दुसऱ्यादिवशी तरुणाने दुस-याचे आधार कार्ड आणि कपड्याचे बिल दिले.

दरम्यान बॉक्सचे वजन आणि बॉक्स मधून येणारा उग्र वास यामुळे कुरिअर एजन्सी चालकाला संशय आला. त्याने एपीएमसी पोलिसांशी संपर्क साधला. पोलिसांनी दोन्ही बॉक्सची पाहणी करून पंचासमोर उघडून पाहिले असता त्यात ४५० ग्रॅम गांजा आढळून आला. याप्रकरणी एपीएमसी पोलिसांनी गुन्हा दाखल केला. हे कुरिअरचे पार्सल देणाऱ्या तरुणाचा शोध पोलिस घेत आहेत.

Edited By : Siddharth Latkar