नितीन पाटणकर | पुणे

Pune Political News :

काँग्रेसने लोकसभा निवडणुकीसाठीच्या ७ उमेदवारांची यादी जाहीर केली. यामध्ये पुण्यातून रविंद्र धंगेकर यांना उमेदवारी जाहीर करण्यात आली आहे. रविंद्र धंगेकर यांना उमेदवारी जाहीर झाल्यानंतर काँग्रेसमधील अंतर्गत वाद उफाळून आला आहे. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

आमदार रवींद्र धंगेकर यांना काँग्रेसकडून उमेदवारी जाहीर झाल्यानंतर माजी उपमहापौर आबा बागुल आक्रमक झाले आहेत. मी कोणाच्याही चपला उचलणार नाही. राहुल गांधी एका बाजूला न्याय यात्रा काढतात, मग निष्ठावंतांना न्याय मिळणार की नाही? असा सवाल उपस्थित करत आबा बागुल भावुक झाले. त्यांच्या डोळ्यात अश्रू देखील तरळले.

आबा बागुल यांना पुणेकरांनी सहा वेळा नगरसेवक म्हणून निवडून दिले आहे. मात्र तरीदेखील आपल्याला डावललं जात असल्याची भावना आबा बागुल यांची आहे. माझ्यात काय कामी होती, अशी विचारणा आबा बागुल यांनी काँग्रेसच्या नेत्यांना केली आहे.

सध्या विद्यमान आमदार असताना धंगेकरांना लोकसभेचं तिकीट देणं कितपत योग्य आहे, हे माझ्या बुद्धीला पटत नाही. पुणे काँग्रेसमध्ये या निर्णयामुळे खदखद आहे. निष्ठावंतांवर अन्याय करुन नुकत्याच पक्षात आलेल्याला उमेदवारी देऊन काय साध्य केले? असा सवाल आबा बागुल यांनी उपस्थित केला.

काँग्रेस पक्षातील वरिष्ठ नेत्यांना मी भेटलो आहे. मित्रपक्षांच्या नेत्यांना सुद्धा भेटून मी माझी क्षमता सांगितली. मात्र तरी मला डावलंल गेलं. पक्षश्रेष्ठींना आम्ही कळवलं आहे. त्यानंतर कार्यकर्त्यांशी चर्चा करून पुढील निर्णय घेणार आहोत. आम्ही महात्मा गांधींना मानणारे आहोत. लोकशाही मार्गाने काँग्रेभवनवर कँडल मार्च काढणार असल्याचा इशारा देखील बागुल यांनी दिला आहे.