अक्षय बडवे, साम टीव्ही

भारताचा स्टार खेळाडू हार्दिक पंड्या अडचणीत सापडला आहे. हार्दिक पंड्याच्या विरोधात पुणे पोलिसांत तक्रार करण्यात आली आहे. एका वकिलाने पंड्याच्या विरोधात तक्रार दाखल केली आहे. तक्रार करताना वकिलांनी हार्दिक पंड्याचे व्हिडिओ देखील जोडला आहे.

टी२० वर्ल्डकपच्या अंतिम सामन्यात टीम इंडियाने न्यूझीलंडला धूळ चारली. टी२० वर्ल्डकप स्पर्धेत टीम इंडियाने सलग दुसऱ्यांदा अंतिम सामन्यात विजय मिळवला. सूर्यकुमार यादवच्या नेतृत्वातील टीम इंडियाने न्यूझीलंडवर ऐतिहासिक विजय मिळवला. या विजयानंतर टीम इंडियातील खेळाडूंनी एकच जल्लोष केला. या विजयानंतर खेळाडूंचे कुटुंबीय मैदानात आले होते. हार्दिक पंड्याची गर्लफ्रेंड देखील विजयाचा जल्लोष करण्यासाठी मैदानात आली होती.

मैदानात जल्लोष करताना हार्दिक पंड्याच्या खांद्यावर भारताचा तिरंगा झेंडा होता. तिरंगा परिधान करून अंतिम सामना संपल्यानंतर अश्लील चाळे केल्याचा आरोप वकील वाजिद खान यांनी केला आहे. भारतानं टी-२० वर्ल्डकप जिंकला आणि मैदानावर पंड्याने तिरंगा परिधान अश्लील चाळे केले असून राष्ट्रीय गौरव अवमान अधिनियम कायद्याअंतर्गत पंड्यावर कारवाईची मागणी वकील खान यांनी केली.

हार्दिक पंड्याचे विजयानंतर अनेक व्हिडिओ सोशल मीडियावर व्हायरल झाले हेते. या व्हिडिओवरून अनेक नेटकऱ्यांनी पंड्यावर टीका केली होती. या कृत्यावर आता वाजिद खान यांनीही आक्षेप घेतला. त्यानंतर वकील वाजिद खान यांनी शिवाजीनगर पोलीस ठाण्यात तक्रार अर्ज दाखल करत सोबत व्हिडिओ देखील जोडले आहेत. आता पोलिसांत तक्रार अर्ज दाखल केल्यानंतर काय कारवाई होते, हे पाहावे लागेल.