• मनोज जरांगेंवर छगन भुजबळांनी केली टीका

• मनोज जरांगेंबाबत सरकारला स्टँड घ्यावा लागेल

• छगन भुजबळांनी मुख्यमंत्र्यांना दिला सल्ला

• समाजाआडून राजकारण करू नका असे शिंदेंनी सांगितले असल्याचे भुजबळ म्हणाले

मराठा आरक्षणाला विरोध करणाऱ्या छगन भुजबळ यांनी मनोज जरांगे यांच्या उपोषणावर सडकून टीका केली. साम टीव्हीच्या 'ब्लॅक अँड व्हाईट' या कार्यक्रमात संपादक निलेश खरे यांनी छगन भुजबळ यांची मुलाखत घेतली. या मुलाखतीमध्ये छगन भुजबळांनी मनोज जरांगे पाटील यांच्यावर गेल्या काही दिवसांपासून काहीच का बोलत नाही? यावर उत्तर दिलं. यावेळी त्यांनी मनोज जरांगे ऐकत नसेल तर त्यावर सरकारला स्टँड घ्यावा लागेल, असे मत व्यक्त केले.

मनोज जरांगेवर आता का नाही बोलत यावर भुजबळ म्हणाले की, 'ओबीसी समाजाचे यामध्ये प्रचंड नुकसान होत आहे यावर आतापर्यंत मीच बोलत होतो. आता बाकीचे ओबीसी नेते बोलायला लागले आहेत. आतमध्ये काय चालले आहे हे मला माहिती होते. मंत्रालयात एक पत्रकार परिषद घेऊन मी सांगितले की, महायुतीच्या सरकारला ओबीसी समाजाने सर्वात जास्त पाठिंबा दिला. सर्व काही होऊन जर हा व्यक्ती ऐकत नसेल तर सरकारला स्टँड घ्यावा लागणार आहे. स्टँड घ्यावा लागणार असेल तर मी बोलून माझं आणि त्याचं भांडण का करायचे. पण सरकारला कळाले आहे की काय खरं आहे. शिंदे बोलले आहेत की समाजासाठी असेल तर बरोबर आहे. पण समाजाआडून राजकारण करणार असेल तर ते अजिबात चालणार आहे. ते सर्व काही बोलले आहे तर आता मला बोलायची काय गरज आहे?'

मनोज जरांगेंवर त्याचीच माणसं आता आरोप करू लागली आहेत. यावर भुजबळ म्हणाले की, 'मला कल्पना होती की हा मनुष्य ऐकणारा नाही. एक झालं की एक असं करणारा आहे. त्याचा अभ्यास कसालाच नाही. तो मुख्यमंत्र्यांना, शिंदेंना, बावनकुळेंना शिव्या द्यायला लागला. वाटेल ते बोलायला लागला. महिला जिल्हाधिकाऱ्यांना घाणेरडं बोलायला लागला. त्याला बोलयाची देखील संस्कृती नाही. त्यामुळे त्याच्यासोबतची लोकं आता बोलायला लागले आहे की, त्या शिवाजी महाराजांच्या टेबलाखालून तंबाखू दिली जाते तिथेच तो थुंकतो. तो खातो देखील हे त्यांचीच माणसं सांगत आहेत.'

कालच्या मंत्रिमंडळ बैठकीत देखील चर्चा झाली की, 'आपण यांना सगळं दिलं. त्याच्याप्रमाणे वागलो सहानुभूती दाखवली. जे जे शक्य आणि अशक्य आहे ते ते दिलं. पण तो सर्वांना शिव्या देतोय. गणपतीमध्ये मागच्यावेळी त्याने काय धिंगाणा घातला हे सर्व जगाने पाहिले. पण हे काय चालले आहे. गणपतीसाठी देश-परदेशातून लोकं येतात. पोलिसांनी त्यांना पाहायचे की याला पाहायचे. म्हणून पोलिसांनी परवानगी नाकारली.'

छगन भुजबळांनी पुढे सांगितले की, 'कुणबी ०.३ टक्के पण नाही. ऐवढे २-४ नाकारले गेले. त्यापेक्षा कमी आहेत. पण ओबीसीचे देखील नाकारले गेले. एससी-एसटीचे देखील नाकारले गेले. मी अनेक कागदं दाखवली आहेत की, मराठा कु, कु मराठा, मराठी कुणबी असे अनेक कागदं खाडाखोड करून लिहिली आहेत. एका हेडमास्टरने सांगितले की, हे प्रमाणपत्र खोटे आहे. त्यात खाडाखोड आहे. हे प्रमाणपत्र मी मान्य करत नाही. त्यानंतर नवीन नवीन हे गॅझेट झालं ते गॅझेट काढा हे जरांगेकडून सुरूच आहे.'