गेल्या वर्षीच्या तुलनेने राज्यात यंदा पावसाला उशिरा सुरुवात झाली. मात्र जुलै महिन्याच्या सुरुवातीच्या काही दिवसांमध्ये पावसाने जोर धरला आणि सगळीकडे हाहाकार माजवला. अनेक ठिकाणी जनजीवन विस्कळीत झालं, तर काही ठिकाणी दरड कोसळल्यामुळे रेल्वे मार्ग आणि रस्ते मार्गावर परिणाम झाला. कर्जत - लोणावळा घाट परिसरात अनेक ठिकाणी दरड कोसळली. अशी परिस्थिती पुन्हा येऊ नये तसेच प्रवासी अडकू नयेत यासाठी मध्य रेल्वेने कर्जत ते लोणावळा दरम्यान रेल्वे मार्गालगत सुमारे २६ किलोमीटर लांबीचा आपत्कालीन रस्ता उभारण्याचा प्रस्ताव तयार करण्यात आला आहे.

या रस्त्यामुळे आपत्कालीन परिस्थितीत बस, रुग्णवाहिका, अग्निशमन दल तसेच मदत पथकांना थेट रेल्वे रुळांपर्यंत पोहोचता येणार आहे. त्यामुळे अडकलेल्या प्रवाशांना तातडीने सुरक्षित स्थळी हलवणे शक्य होईल. तसेच पिण्याचे पाणी, अन्न, औषधे आणि इतर आवश्यक मदत साहित्यही घटनास्थळी लवकर पोहोचवता येईल. याच पार्श्वभूमीवर आपत्कालीन रस्ता उभारण्याचा निर्णय घेण्यात आला आहे.

मध्य रेल्वेने नुकसानग्रस्त मार्गाच्या दुरुस्तीचे काम युद्धपातळीवर सुरू ठेवले आहे. अधिकाऱ्यांच्या माहितीनुसार, पहिली रेल्वे लाईन अवघ्या ४८ तासांत सुरू करण्यात आली होती. त्यानंतर १५ जुलै रोजी दुसरी लाईनही वाहतुकीसाठी खुली करण्यात आली. तिसऱ्या लाईनवरील दुरुस्तीचे काम सध्या अंतिम टप्प्यात असून ते वेगाने सुरू आहे

प्रवाशांच्या सुरक्षिततेला प्राधान्य देत उर्वरित लाईन लवकरात लवकर सुरू करण्यासाठी आणि भविष्यात अशा आपत्कालीन परिस्थितीला अधिक प्रभावीपणे सामोरे जाण्यासाठी हा २६ किलोमीटरचा आपत्कालीन रस्ता महत्त्वाचा ठरणार असल्याचे मध्य रेल्वेच्या अधिकाऱ्यांनी सांगितले.