रेल्वे प्रवाशांसाठी महत्त्वाची बातमी समोर आली आहे. ट्रेनमध्ये बसण्यापूर्वी आता सामानाला स्कॅनर करून त्याला स्टिकर लावण्यात येणार आहे. त्याशिवाय प्रवाशांना रेल्वेत बसण्याची परवानगी नसल्याचं मध्य रेल्वेने म्हटलं आहे. प्रवाशांच्या सुरक्षिततेच्या दृष्टिकोनातून हा निर्णय घेण्यात येणार आहे.

छत्रपती शिवाजी महाराज टर्मिनस मुंबईतील प्रमुख टर्मिनस असून येथून दररोज शेकडो मैल व एक्स्प्रेस सुटतात. या स्थानकातून अनेक प्रवासी प्रवास करतात. या प्रवाशांच्या सुरक्षिततेसाठी मध्य रेल्वेने नवीन उपाययोजना लागू केली आहे. रेल्वे प्रशासनाने काही दिवसांपूर्वी मेल-एक्सप्रेसच्या मुख्य प्रवेशद्वारांवर दोन बॅगेज स्कैनर बसवले आहेत.

यासोबतच लोकलच्या प्लॅटफॉर्मवरून आणि तिकीट काउंटरकडून एक्स्प्रेसच्या प्लॅटफॉर्मकडे जाणाऱ्या सर्व प्रवेशद्वारांवर बॅरिकेट्स लावून ते सुरक्षित करण्यात आले आहेत. या उपाययोजनांमुळे बॅगची तपासणी पूर्ण झाल्यानंतरच प्रवाशांना प्लॅटफॉर्मवर प्रवेश मिळणार आहे.

शिवाय प्रवाशांच्या बॅगेवर रेल्वेचा विशिष्ट प्रकारचा एक स्टिकर लावण्यात येईल. ज्या प्रवाशांच्या बॅगेला हा स्टिकर नसेल त्यांना रेल्वेत बसता येणार नसल्याचं समोर आलं आहे. यामुळे रेल्वे परिसरातील सर्व प्रवाशांच्या सुरक्षेला बळकटी मिळणार आहे. त्यामुळे आता रेल्वेतून प्रवास करण्यापूर्वी हे नियम पाळा अन्यथा प्रवास करता येणार नाही.