रेल्वे प्रवाशांसाठी महत्वाची माहिती समोर आली आहे. NEET UG 2026 परीक्षेसाठी विद्यार्थ्यांच्या सोयीकरिता मध्य रेल्वेने मोठा निर्णय घेतला आहे. ३ एप्रिल रोजी रविवारी मेगा ब्लॉक घेण्यात येणार नाही. तथापि, विविध अभियांत्रिकी व देखभाल कामांसाठी मध्य रेल्वे मुंबई विभागात २ एप्रिल रोजी छत्रपती शिवाजी महाराज टर्मिनस आणि विद्याविहार स्थानकांदरम्यान मेन लाईनवर तसेच ठाणे ते वाशी/नेरुळ स्थानकांदरम्यान ट्रान्स हार्बर मार्गावर मध्यरात्री मेगा ब्लॉक घेण्यात येणार आहे. त्यामुळे प्रवाशांनी घराबाहेर पडण्याआधी वेळापत्रक जाणून घ्या.

मध्य रेल्वेवर छत्रपती शिवाजी महाराज टर्मिनस आणि विद्याविहार दरम्यान अप व डाउन धीम्या मार्गांवर रात्री ००.०५ ते पहाटे ०५.०५ वाजेपर्यंत २ एप्रिल रोजी मध्यरात्री मेगा ब्लॉक घेण्यात येईल. या कालावधीत छत्रपती शिवाजी महाराज टर्मिनस येथून रात्री २३.३० ते पहाटे ०४.४७ पर्यंत सुटणाऱ्या डाउन धीम्या मार्गावरील सेवा विद्याविहारपर्यंत डाउन जलद मार्गावर वळविण्यात येतील. त्या भायखळा, परळ, दादर, माटुंगा, शीव आणि कुर्ला स्थानकांवर थांबतील तसेच पुढे विद्याविहार येथे पुन्हा डाउन धीम्या मार्गावर वळविण्यात येतील.

घाटकोपर येथून रात्री २३.२९ ते पहाटे ०५.०४ पर्यंत सुटणाऱ्या अप धीम्या मार्गावरील सेवा विद्याविहार ते छत्रपती शिवाजी महाराज टर्मिनस दरम्यान अप जलद मार्गावर वळविण्यात येतील व त्या कुर्ला, शीव, माटुंगा, दादर, परळ आणि भायखळा स्थानकांवर थांबतील.

ट्रान्स हार्बर मार्गावर ठाणे ते वाशी/नेरुळ दरम्यान रात्री ११.४५ ते पहाटे ४.४५ या वेळेत दोन्ही मार्गांवरील सेवा पूर्णपणे बंद राहतील. त्यामुळे या मार्गावर प्रवास करणाऱ्या प्रवाशांना पर्यायी व्यवस्था करावी लागणार आहे. काही गाड्या रद्द करण्यात आल्याचीही माहिती रेल्वेने दिली आहे. रेल्वे प्रशासनाने स्पष्ट केले आहे की, ही कामे पायाभूत सुविधा मजबूत करण्यासाठी आणि प्रवाशांच्या सुरक्षिततेसाठी अत्यावश्यक आहेत. त्यामुळे प्रवाशांना होणाऱ्या गैरसोयीबद्दल दिलगिरी व्यक्त करण्यात आली आहे. दरम्यान, NEET परीक्षेच्या दिवशी दिवसभर कोणताही ब्लॉक नसल्याने विद्यार्थ्यांना मोठा दिलासा मिळाला आहे.