संघर्ष गांगुर्डे, साम टीव्ही

डोंबिवली देसलेपाडा परिसरात भंगार दुकानाबाहेर भंगार ठेवल्याच्या कारणावरून झालेल्या वादातून भंगार व्यवसायिकाला वडिलांसह लाकडी दांडक्याने मारहाण झाल्याची गंभीर घटना उघडकीस आली आहे. या प्रकरणी पंकज मौर्या व त्यांचे वडील विनोद मौर्या यांनी सागर कोटकर व त्याच्यासोबत असलेल्या दोन अनोळखी व्यक्तीविरोधात मानपाडा पोलीस ठाण्यात तक्रार दाखल केली आहे. ही संपूर्ण घटना सीसीटीव्ही कॅमेऱ्यात कैद झाली आहे.

मिळालेल्या माहितीनुसार, देसलेपाडा येथील भंगार दुकानाबाहेर भंगार ठेवले असल्याने सागर कोटकर तेथे आला आणि दुकानाबाहेर भंगार का ठेवले आहे, असा जाब विचारत पंकज मौर्या यांना शिवीगाळ केली. यावेळी पंकज यांनी भंगार भरण्यासाठी गाडी येत असल्याचे सांगून समजावण्याचा प्रयत्न केला. मात्र याचा राग आल्याने सागर कोटकरने पंकज यांच्या उजव्या गालावर चापटीने मारहाण केली. त्यानंतर धक्का देऊन तो घटनास्थळावरून निघून गेला. या धक्क्यामुळे पंकज खाली पडले असून त्यांच्या उजव्या हाताच्या मनगटाला खरचटले.

पंकज यांनी तात्काळ आपल्या वडील विनोद मौर्या यांना फोन करून संपूर्ण प्रकार सांगितला. काही वेळातच सागर कोटकर हा दोन अनोळखी व्यक्तीसह पुन्हा दुकानात आला. शिवीगाळ करत तिघांनीही दुकानात पडलेले लाकडी दांडक्याने विनोद मौर्या यांच्या उजव्या हातावर व पाठीवर बेदम मारहाण केली. मारहाणीनंतर तिन्ही आरोपी घटनास्थळावरून फरार झाले.

घटनेनंतर जखमींनी मानपाडा पोलीस ठाण्यात धाव घेतली. त्यांनतर आरोपींच्या विरोधात गुन्हा दाखल करण्यात आला आहे. घटनेचा पुढील तपास मानपाडा पोलीस करत आहेत. मारहाणीच्या घटनेमुळे परिसरातील लोकांमध्ये भीतीचं वातावरण पसरलं आहे. स्थानिक नागरिकांकडून कारवाईची मागणी केली जात आहे.