योगेश काशिद, साम टीव्ही

बीड जिल्ह्यातील अमानुष मारहाण आणि अत्याचाराच्या घटना काही केल्या थांबायच्या नाव घेत नसल्याचे चित्र पाहायला मिळत आहे. बीडमध्ये पुन्हा एकदा एका तरुणाला बेदम मारहाण झाल्याची घटना घडली आहे. किरकोळ कारणावरून एका तरुणाला लोखंडी रॉड आणि लाकडी दांड्यानी अमानुषपणे मारहाण करण्यात आलीये. ही घटना नेकनुर पोलीस ठाण्याच्या हद्दीतील खर्डेवाडी गावात तीन दिवसांपूर्वी घडली आहे.

संदीप आहेर असं जखमी तरुणाचे नाव आहे. या जखमी तरुणावर बीडच्या शासकीय रुग्णालयात उपचार सुरू आहेत. गावातील धनराज भोसले याने रात्रीच्या सुमारास ही अमानुष मारहाण केल्याचा आरोप आहे. आरोपी धनराज भोसले याची गावात मोठी दहशत आहे. त्याने अनेक जणांना यापूर्वीदेखील गावात मारहाण केली होती.

धनराज भोसले रात्रीच्या दहा वाजण्याच्या सुमारास पीडित तरुणाच्या घरी गेला. त्याने सुरुवातीला शिवीगाळ केली. त्यानंतर लोखंडी रॉड आणि लाकडी दांड्यानी पीडित तरुणाला घरासमोरच अमानुष मारहाण केली. आरोपीवर कडक कारवाई करावी अशी मागणी पीडित कुटुंबाने केली आहे. या प्रकरणाचा तपास आता नेकनूर पोलीस करत आहेत.

बीडमधील गुन्हेगारी कधी संपणार?

बीडमध्ये गेल्या वर्षभरापासून सातत्याने तरुणांना अमानुष मारहाणीच्या घटना उघडकीस येत आहे. सामान्य तरुणांना सातत्याने मारहाण होत असल्यामुळे बीडमधील जनता दहशतीत आहे. बीडमध्ये पुन्हा एकदा एका तरुणाला मारहाण झाल्याची घटना उघडकीस आल्याने नागरिकांकडून कडक कारवाईची मागणी करण्यात आली आहे. जिल्ह्यातील गुन्हेगारी कधी संपणार, अशी विचारणा देखील नागरिक करत आहेत.