मुंबई: बोल बच्चन करुन नागरिकांना लुटणाऱ्या त्रिकुटाला मुलुंड पोलिसांनी बेड्या (Arrested) ठोकल्या आहेत. त्यांच्यावर आतापर्यंत विविध पोलीस ठाण्यांमध्ये शंभर गुन्हे दाखल आहेत. काही दिवसांपूर्वी मुलुंडच्या एस. एल. रोडवर एका वरिष्ठ नागरिकाला बोलण्यात अडकवून काही मिनिटांत त्याच्याकडील दागिने आणि रोख रक्कम मिळून १ लाख ८४ हजार रुपयांचा मुद्देमाल लंपास केला होता. (Mumbai Crime News)

गेल्या दोन महिन्यात घाटकोपर ते मुलुंड या परिसरात बोलबच्चन गॅंगने लुटण्याचा पाच घटना घडल्या होत्या, त्यामुळे या वाढत्या प्रकारांचे गांभीर्य लक्षात घेऊन पोलिसांनी आरोपींच्या शोधासाठी विविध पथके नेमली होती. तपासाअंती सीसीटीव्हीमध्ये दिसत असलेले हे त्रिकूट अभिलेखावरील गुन्हेगार असलेले संजय मागडे, रमेश जयस्वाल, नरेश जयस्वाल असल्याचं निष्पन्न झालं. हे तिघे गेल्या काही दिवसांपासून आपल्या मूळ घरापासून नवी मुंबईमध्ये (Navi Mumbai) वेगवेगळ्या लॉजमध्ये राहून पोलिसांना गुंगारा देण्यासाठी जागा बदलत असल्याचं पोलिसांना कळालं. त्यानुसार पोलिसांनी एका लॉजवर छापा टाकून या तिघांच्या मुसक्या आवळल्या. त्यांच्याकडून मुलुंडमध्ये केलेल्या चोरीचा १ लाख ८४ हजारांचा मुद्देमाल हस्तगत करण्यात आला.

या सोबतच परिमंडळ सात परिसरात अशाच प्रकारचे पाच गुन्हे त्यांनी केले असल्याची कबुली दिली. महत्त्वाचं म्हणजे हे तिघे अभिलेखावरील गुन्हेगार आहेत आणि त्यांच्यावर विविध पोलीस ठाण्यांमध्ये शंभरपेक्षा जास्त गुन्हे दाखल आहेत. अटकेची कार्यवाही झाल्यानंतर जेलमधून बाहेर पडल्यावर पुन्हा त्यांचा हा शिरस्ता सुरू होतो.

Edited By - Akshay Baisane