मुंबई महापालिका निवडणुकीसाठी महायुतीचं जागावाटप निश्चित झालंय. अनेक दिवसांपासून चालू असलेल्या वाटाघाटीनंतर भाजप आणि शिवसेनेचं जागावापट झालंय. भाजप १३७ जागांवर उमेदवार देणार आहे तर शिंदे सेना ९० जागांवर लढणार आहे. जागावाटपा संदर्भात दोन्ही पक्षांकडून मोठी रस्सीखेच सुरू होती. आज अखेर तिढा सुटला असून दोन्ही पक्षांकडून जागावाटपावर सहमती दर्शवलीय.

२३ डिसेंबरपासून मुंबई महापालिकेसाठी उमेदवारी अर्ज भरण्यास सुरुवात झालीय. ३० डिसेंबर ही अर्ज भरण्याची शेवटची तारीख आहे. अर्ज भरण्याच्या काही तासांआधीच भाजप आणि शिंदे गट शिवसेनेचं जागावाटप निश्चित झालंय. मुंबई महापालिकेत एकूण २२७ प्रभाग आहेत. भाजप आणि शिवसेना शिंदे यांच्यात २०७ जागांवर आधीच एकमत झालं होतं. आज अखेरच्या २० जागांवर अंतिम निर्णय घेण्यात आला. २० जागांच्या संदर्भात एकनाथ शिंदे यांच्यासोबत चर्चा झाली. आधीच्या २०७ जागांवर झालेल्या एकमतानुसार भाजप १२८ जागा, तर शिवसेने ७९ जागा घेतल्या होत्या.

अमित साटम काय म्हणाले?

भाजप, शिवसेना, आरपीआयची महायुतीची चर्चा पूर्ण झालीय. याआधी आमची २०७ जागांवर चर्चा पूर्ण झाली होती. आता आमची संपूर्ण २२७ जागांवर चर्चा झालीय. या जागावाटपानुसार भाजप १३७ जागा लढवणार आहे. तर एकनाथ शिंदेंची शिवेसना ९० जागा लढवणार आहेत. महायुतीतील इतर मित्र पक्षांचाही यात समावेश आहे. १३७ जागा भाजपच्या कोट्यात आहेत.

तर शिवसेनेकडे ९० जागां आहेत. यात इतर मित्र पक्षांना सामावून घेतले जाईल, असं अमित साटम म्हणालेत. भाजप आणि शिवसेनेत कोणतीही नाराजी नाहीये, सर्वांना सामावून घेतल्यानं वेळ लागला. तर सकारात्मक चर्चा होऊन चांगला फॉर्म्युला ठरवण्यात आला आहे. २२७ जागांवर महायुतीचे उमेदवार निवडणूक लढवून १५० पेक्षा जास्त जागा निवडून आणणार आहोत, असं माजी खासदार राहुल शेवाळे या जागावाटपाच्या चर्चेवर म्हणालेत.