संजय गडदे, साम टीव्ही

मुंबई: गोरेगाव प्रभाग क्रमांक ४० मधील शिवसेना (उद्धव बाळासाहेब ठाकरे) गटाचे नगरसेवक तुळशीराम शिंदे यांच्या अडचणी वाढण्याची शक्यता निर्माण झाली आहे. दिंडोशी येथील संतोष नगर परिसरातील त्यांच्या घरावर कारवाई करण्यासाठी मुंबई महापालिकेने नोटीस बजावली असून, संभाव्य तोडक कारवाईसाठी पोलिस बंदोबस्ताची मागणीही केली आहे. त्यामुळे आता नगरसेवक शिंदे यांच्या घरावर महापालिकेचा बुलडोझर चालणार का, याकडे राजकीय वर्तुळाचे लक्ष लागले आहे.

दिंडोशी मनपा वसाहत, संतोष नगर परिसरात तुळशीराम शिंदे यांचे १४ फुटांपेक्षा अधिक उंचीचे घर असल्याचा आक्षेप घेण्यात आला आहे. या घराच्या बांधकामाविरोधात प्रभाग क्रमांक ४० मधील भाजपचे पराभूत उमेदवार संजय आव्हाड यांनी मुंबई महापालिकेकडे तक्रार केली होती. झोपडपट्टी परिसरात नियमांचे उल्लंघन करून अधिक उंचीचे बांधकाम करण्यात आल्याचा आरोप या तक्रारीत करण्यात आला होता. तसेच नगरसेवक पदाचा गैरवापर करून हे घर बांधण्यात आल्याचा आरोपही आव्हाड यांनी केला आहे.

या तक्रारीच्या अनुषंगाने मुंबई महापालिकेने तुळशीराम शिंदे यांच्या घरावर कारवाई करण्यासाठी ३ तारखेची नोटीस जारी केली आहे. संभाव्य तोडक कारवाईच्या पार्श्वभूमीवर पालिका प्रशासनाने पोलिसांकडे बंदोबस्ताची मागणी केल्याने या प्रकरणाला अधिक महत्त्व प्राप्त झाले आहे. दरम्यान, भाजपकडून करण्यात आलेले आरोप नगरसेवक तुळशीराम शिंदे यांनी फेटाळले आहेत. आपले घर १९८० ते १९८५ या कालावधीत बांधण्यात आले असून, ते नवीन बांधकाम नसल्याचा दावा त्यांनी केला आहे. याशिवाय संतोष नगर परिसरात त्यांच्या घराइतकीच उंची असलेली चार ते पाच हजार घरे असल्याचेही त्यांनी सांगितले.

महापालिकेला कारवाई करायचीच असेल, तर केवळ आपल्या घरावर कारवाई न करता परिसरातील अशा सर्व घरांवर समान पद्धतीने कारवाई करावी, अशी मागणी शिंदे यांनी केली आहे. एकीकडे भाजपकडून अनधिकृत बांधकामाचा आरोप करून कारवाईची मागणी करण्यात येत असताना, दुसरीकडे ठाकरे गटाच्या नगरसेवकाने जुन्या बांधकामाचा दाखला देत कारवाईला आक्षेप घेतला आहे. त्यामुळे संतोष नगरमधील या घराच्या कारवाईवरून भाजप आणि ठाकरे गटातील राजकीय संघर्ष अधिक तीव्र होण्याची शक्यता आहे. आता महापालिका प्रशासन प्रत्यक्ष कारवाई करते की या प्रकरणात आणखी काही घडामोडी घडतात, याकडे सर्वांचे लक्ष लागले आहे.