मुंबई महापालिकेकडून दिवाळीत ४२६ घरांसाठी लॉटरी जाहीर
१४ नोव्हेंबरपर्यंत अर्ज करू शकता
घरांच्या किंमती ५४ लाख ते १.१२ कोटींपर्यंत असणार आहेत
भायखळा आणि कांजुरमार्गसह विविध भागांतील घरे लॉटरीमध्ये उपलब्ध
मुंबईमध्ये हक्काचे घर घेण्याचे अनेकांचा स्वप्न लवकरच पूर्ण होणार आहे. मुंबई महानगर पालिकेकडून ४२६ घरांसाठी दिवाळीमध्ये लॉटरी काढण्यात येणार आहे. मुंबई महानगर पालिकेने अत्यल्प उत्पन्न गटातील नागरिकांसाठी घर बांधण्याच्या योजनेला सुरूवात केली आहे.सिडको आणि म्हाडाच्या धर्तीवर मुंबई महानगर पालिकेने पहिल्यांदाच घरांसाठी लॉटरी काढली आहे. या घरांच्या लॉटरीसाठी अर्ज करण्याची प्रक्रिया सुरू झाली आहे. पालिकेने काढलेल्या ४२६ घरांसाठी किती किंमत मोजावी लागणार आहे?, अर्ज करण्याची तारीख काय आहे? त्याचसोबत या घरांचे ठिकाण काय आहे? या सर्व गोष्टी आपण जाणून घेणार आहोत...
मिळालेल्या माहितीनुसार, महापालिकेला भूखंडाच्या निवासी प्रकल्पातून बिल्डरकडून मिळालेल्या घरांमधील ४२६ घरांसाठी दिवाळीत लॉटरी निघणार आहे. यासाठी आजपासून अर्ज करण्याची प्रक्रिया सुरू झाली आहे. ही अर्ज करण्याची प्रक्रिया १४ नोव्हेंबरपर्यंत सुरू राहणार आहे. २६ ते ३८ चौरस मीटर चटई क्षेत्र व अल्प आणि अत्यल्प गटासाठी असलेल्या या घरांची किंमत ५४ लाखांपासून ते १ कोटी १२ लाखांपर्यंत असणार आहे. मुंबई महानगर पालिकेच्या या लॉटरीमध्ये भायखळामधील २७० चौरस फुटांच्या घरांसाठी नागरिकांना तब्बल १ कोटी ७ लाख रुपये मोजावे लागणार आहे. तर कांजुरमार्ग येथील ४५० चौरस फुटांच्या घरासाठी नागरिकांना ९८ लाख ते १ कोटींपर्यंत पैसे मोजावे लागणार आहे.
विकास नियंत्रण नियमावली १५ नुसार ४ हजार चौरस फुटांपेक्षा मोठ्या भूखंडावरील निवासी प्रकल्पातून विकासकाने ८० टक्के घरांची विक्री केल्यानंतर पालिकेला २० टक्के घरे मोफत देणे अनिवार्य आहे. यानुसार पालिकेला ८०० घरे मिळाली आहेत. यामधील आता ४२६ घरांसाठी दिवाळीमध्ये लॉटरी निघणार आहे. मुंबई महानगरपालिका आयुक्त भूषण गगराणी यांच्या निर्देशानुसार ही लॉटरी प्रक्रिया राबवण्यात येणार आहे.
१६ ऑक्टोबर रोजी सकाळी १० वाजल्यापासून ऑनलाईन अर्ज विक्री आणि स्वीकृतीची प्रक्रिया सुरू झाली. अर्जदारांना १४ नोव्हेंबर रोजी सायंकाळी ५ वाजेपर्यंत अर्ज भरता येणार आहे. अर्ज शुल्क आणि अनामत रक्कम १४ नोव्हेंबर रात्री ११.५९ वाजेपर्यंत स्वीकारण्यात येईल. पात्र अर्जदारांची अंतिम यादी १८ नोव्हेंबर रोजी सायंकाळी ५ वाजता जाहीर करण्यात येईल. सोडत प्रक्रिया २० नोव्हेंबर २०१५ रोजी सायंकाळी ५ वाजता पार पडेल.
पालिकेच्या घरांच्या सोडतीसंदर्भात माहिती पुस्तिका १६ नोव्हेंबर रोजी वेबसाईटवर उपलब्ध केली जाईल. या सोडतीसंदर्भात अधिक माहिती जाणून घेण्यासाठी 022-22754553 या मदत सेवा क्रमांकावर किंवा bmchomes@mcedgmed.goved.in या ई-मेल आयडीवर संपर्क साधावा अथवा सहाय्यक आयुक्त (मालमत्ता), चौथा मजला, विस्तारित इमारत, पालिका मुख्यालय, फोर्ट इथे संपर्क साधावा.
कांदिवली - ४ घरं - ८१,७९,२१७ रुपये
कांजूर - २७ घरं - ९७,८६,३९२ रुपये
मरोळ(अंधेरी) - ७८,५०,९१० रुपये
एलबीएस मार्ग ( भांडूप) - २४० घरं - ६३,५०,९८६ रुपये
वाढवण, कांदिवली - ३० घरं - ६३,७७,१६२ रुपये
दहिसर - ४ घरं - ६६,४०,०९० रुपये
प्रेस्टिज, भायखळा - ४२ घरं - १,०१,२५,१०९ रुपये
जोगेश्वरी - ४६ घरं - ५४,२७,४०४ रुपये
पिरामल नगर, गोरेगाव- ५९,१५,६०२ रुपये
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.