अभिजित देशमुख, साम टीव्ही, प्रतिनिधी

Latest Kalyan-Dombivli News in Marathi:

विधानसभा निवडणुकीचे वारे वाहू लागले असून महायुतीतील मित्र पक्षांमध्ये जागावाटपाबाबत चर्चा सुरू आहे. मात्र कल्याण पूर्व विधानसभा मतदारसंघात शिवसेना आणि भाजपमध्ये रस्सीखेच सुरू आहे. गणेशोत्सवाचे निमित्त साधून अनेक इच्छूकांनी विविध ठिकाणी कमानी आणि बॅनर उभारले आहे.

कल्याण पूर्वेतून शिवसेनेकडूुन इच्छूक असलेले माजी नगरसेवक विशाल पावशे यांचा पुन्हा असाच एक लक्षवेधी बॅनर झळकला आहे. यापूर्वीही पावशे यांनी यापूर्वी दोन खळबळजनक बॅनर लावले होते. त्यांनी या बॅनरच्या माध्यमातून काही प्रश्न उपस्थित केले होते.

आता लावलेल्या बॅनरमध्ये पहिले नमन विकासाचे, दुसरे वंदन ट्रॅफिक मुक्तीचे, तिसरे मागणे चांगल्या रस्त्यांचे, चौथी इच्छा स्वच्छतेची, पाचवी आशा सुरक्षिततेची या गोष्टीवर भर देत हवी फक्त तुमची साथ आणि माया, अशी साद या बॅनरच्या माध्यमातून घालण्यात आली आहे. हा बॅनर पावशे यांनी भाजप आमदार गणपत गायकवाड यांच्या कमानी शेजारीच लावला असल्याने चर्चेचा विषय ठरला आहे.

कल्याण पूर्वेतील भाजप आमदार हे तीन वेळा निवडून आलेले आमदार आहे. कल्याण पूर्वेतील शिवसेना शिंदे गटाचे शहरप्रमुख महेश गायकवाड यांच्यावर केलेल्या गोळीबार प्रकरणात आमदार गायकवाड हे सध्या तळोजा तुरुंगात आहेत.

विधानसभा निवडणूकीत कल्याण पूर्वेतून शिवसेना शिंदे गटातील पदाधिकारी महेश गायकवाड, निलेश शिंदे, विशाल पावशे हे या मतदारसंघातून निवडणूक लढण्यास इच्छुक आहेत. या मतदारसंघावर शिवसेना शिंदे गटाने दावा केला आहे. त्यामुळे कल्याण पूर्व विधानसभा मतदारसंघात शिवसेना भाजपमध्ये रस्सीखेच सुरू असल्याचे दिसून येत आहे. यातच कल्याण पूर्व विधानसभा मतदारसंघ कुणाच्या वाट्याला जाणार, हे पाहणं महत्वाचं ठरणार आहे.