मुंबईत महायुतीतच वादाची ठिणगी पडलीय... शिंदेसेनेचे नेते समाधान सरवणकरांनी माहिममधील भाजपच्या स्थानिक नेत्यांवर केलेल्या आरोपामुळे एकच खळबळ माजलीय... त्यामुळे मुंबईत पराभवानंतर कसं राजकारण तापलयं?

मुंबई महापालिका निवडणुकीतील पराभवानंतर महायुतीत आरोप-प्रत्यारोपांच्या फैरी सुरू झाल्यायत.व्हॉटसअॅपच्या माध्यमातून निवडणुकीत शिंदेसेनेच्या उमेदवारांना पाडण्यासाठी भाजपची एक टोळी सक्रीय असल्याचा आरोप समाधान सरवणकरांनी केलाय... त्यामुळे सरवणकरांच्या आरोपावर ठाकरेसेनेचे आमदार महेश सावंत आणि भाजप नेते संतोष धुरी यांनी खोचक टीका केलीय...

दुसरीकडे या आरोपांनंतर सरवणकर खोटी माहिती पसरवत असल्याचा आणि अपयशाचं खापर मित्र पक्षांवर फोडत असल्याचा हल्लाबोल भाजप महामंत्री अक्षता तेंडुलकरांनी केलाय... तर तेंडुलकरांना मिरची का झोंबली, अशी टीका करत समाधान सरवणकरांनी थेट काही व्हॉट्सअप चॅटच जारी केलेत...

दरम्यान सरवणकरांच्या आरोपांमुळे महायुतीतील अंतर्गत वाद चव्हाट्यावर आल्यानंतर मुंबई अध्यक्ष अमित साटम यांनी सरवणकरांच्या आरोपांची चौकशी करणार असल्याचं सांगितलयं...मुंबई महापालिकेतील महापौर पदावरून आधीच भाजप आणि शिंदेसेनेत अंतर्गत धुसफुस आहे... अशातच दोन्ही पक्षातील नेत्यांमध्ये निवडणुकीतील असहकार्यावरून वाद निर्माण झाल्यानं मुंबई महापालिकेतील सत्तास्थापनेनंतर या वादाचा नेमका काय परिणाम होतो? हे पाहणं महत्त्वाचं ठरणार आहे..