अक्षय बडवे, साम टीव्ही, प्रतिनिधी

Pune : काश्मीर फाईल्ससारखा मालेगाव फाईल्स हा सिनेमाही झाला पाहिजे अशी मागणी भाजप खासदार मेधा कुलकर्णी यांनी केली आहे. मालेगाव बॉम्बस्फोटातील आरोपींपैकी एक असलेले कर्नल प्रसाद पुरोहित यांचे पुण्यात जंगी स्वागत करण्यात आले. या स्वागत समारंभाला मेधा कुलकर्णी हजर होत्या. त्यावेळी कुलकर्णी यांनी हे वक्तव्य केले.

कर्नल प्रसाद पुरोहित यांची मालेगाव बॉम्बस्फोट प्रकरणात निर्दोष सुटका करण्यात आली. न्यायालयाच्या या निर्णयानंतर आज पुण्यात प्रसाद पुरोहित यांच्या घरी त्यांचे जोरदार स्वागत करण्यात आले. कर्नल पुरोहित यांच्या उपस्थितीमध्ये पुण्यात शोभायात्रा काढण्यात आली. यावेळी खासदार मेधा कुलकर्णी यांनी कर्नल प्रसाद पुरोहित यांचे स्वागत केले, अभिनंदन केले.

'काश्मीर फाईल्सप्रमाणे मालेगाव फाईल्स हा सिनेमा काढावा. काँग्रेसने त्यांच्या काळात फेक नरेटीव्ह पसरवले होते. त्यांचे पितळ उघडं पाडण्यासाठी मालेगाव फाईल्स हा सिनेमा आलाच पाहिजे' अशी मागणी भाजप खासदार मेधा कुलकर्णी यांनी केली. यावेळी मालेगाव बॉम्बस्फोट प्रकरणाबाबत प्रतिक्रिया देताना त्यांनी काँग्रेसवर निशाणा साधला.

३१ ऑगस्ट रोजी मालेगाव बॉम्बस्फोट प्रकरणाचा निकाल लागला. या बॉम्बस्फोट प्रकरणात साध्वी प्रज्ञा सिंह ठाकूर, लेफ्टनंट कर्नल प्रसाद पुरोहित, मेजर रमेश उपाध्याय, सुधाकर द्विवेदी, समीर कुलकर्णी, अजय राहिरकर आणि सुधाकर चतुर्वेदी या सात आरोपींची निर्दोष सुटका करण्यात आली. तब्बल १७ वर्षांनंतर मालेगाव बॉम्बस्फोट प्रकरणाची सुनावणी पूर्ण झाली.