फैय्याज शेख भिवंडी

भिवंडीमध्ये वाहतूक पोलिसाला बेदम मारहाण करण्यात आल्याची धक्कादायक घटना समोर आली आहे. वाहतूक पोलिसाने टेम्पोला अडवले त्यामुळे चालकाने संतप्त होत आधी शिवीगाळ केली त्यानंतर वाहतूक पोलिसाला लाथाबुक्क्यांनी मारहाण केली. भररस्त्यात वाहतूक पोलिसाला मारहाण करण्यात आली. या घटनेचा व्हिडीओ समोर आला असून तो व्हायरल होत आहे.

मिळालेल्या माहितीनुसार, भिवंडी तालुक्यातील भिवंडी-ठाणे मार्गावर पूर्णा गावाजवळ ही घटना घडली. वाहतूक पोलिस आणि टेम्पो चालकामध्ये हाणामारी झाली. टेम्पो चालकाला पोलिसाने थांबण्यास सांगितले. पण टेम्पो चालकाने न थांबता वाहतूक पोलिसाला शिवीगाळ केली. वाहतूक पोलिसाने पुन्हा या टेम्पो चालकाला थांबवण्याचा प्रयत्न केला तेव्हा त्याने पोलिसाला मारहाण केली.

टेम्पोला थांबवले म्हणून चालक आणि वाहतूक पोलिस या दोघांमध्ये बाचाबाची झाली. त्यानंतर टेम्पो चालकाने वाहतूक पोलिसाला मारहाण केली. वाहतूक पोलिसाने देखील या चालकाला चांगला चोप दिला. या घटनेचा व्हिडीओ सध्या व्हायरल होत आहे. विजय चव्हाण असे वाहतूक पोलिसाचे नाव आहे. या चालकाला पोलिसांनी ताब्यात घेतलं. नारपोली पोलिस ठाण्यात वाहन चालकाविरोधात गुन्हा दाखल करण्याचे प्रक्रिया सुरू करण्यात आली आहे.

दरम्यान, नालासोपाऱ्यामध्ये वाहतूक पोलिसांना भरचौकात बेदम मारहाण करण्यात आल्याची घटना घडली होती. नालोसोपाऱ्यातील प्रगती नगरमध्ये ही धक्कादायक घटना घडली होती. दुचाकीला अडवल्यामुळे झालेल्या बाचाबाचीमध्ये बापलेकाने दोन वाहतूक पोलिसांना मारहाण केली होती. या मारहाणीचा व्हिडीओ व्हायरल झाला होता. या प्रकरणी बापलोकाविरोधात गुन्हा दाखल करत पोलिसांनी त्यांना अटक केली होती.