सचिन जाधव

Pune News: दिवंगत नेते भाजप नेते गिरीश बापट यांच्या निधनाने रिक्त झालेल्या लोकसभेच्या जागेवर पोटनिवडणूक होण्याची शक्यता आहे. पुणे लोकसभा पोटनिवडणुकीमुळे सर्वच राजकीय पक्षांनी जय्यत केली आहे. याच पोटनिवडणुकीवर राष्ट्रवादीचे जेष्ठ नेते अजित पवार यांनी मोठं वक्तव्य केलं आहे. 'महाविकास आघाडीत ज्यांची जास्त ताकद आहे, त्यांना ती जागा मिळावी, असं विधान अजित पवार यांनी केलं आहे. (Latest Marathi News)

पुणे लोकसभा पोटनिवडणुकीसाठी सर्वच राजकीय पक्षांनी जय्यत केली आहे. अजित पवार म्हणाले, 'पुण्याची पोटनिवडणूक लागण्याची शक्यता आहे, माझ्या आतल्या गोटातील माहिती आहे. ज्यांची जिथं जास्त ताकद आहे, तिथं त्या पक्षाच्या उमेदवाराला तिकीट द्यायचं. पुण्यात कुणाची ताकद आहे हे आधीच्या निवडणुकीत कुणाचे किती लोक निवडून आले यावर ठरते. आमची ताकद किती हे माहिती आहेच. महाविकास आघाडीत ज्यांची जास्त ताकद त्यांना ती जागा मिळावी. मित्र पक्षाला बोलण्याचा अधिकार आहे'.

राष्ट्रवादीच्या बैठकीच्या चर्चेवर भाष्य करताना अजित पवार म्हणाले, ' राष्ट्रवादी कॉंग्रेसची बैठक नाही. ही धादांत खोटी माहिती आहे. रयत शिक्षण संस्थेच्या निवडीबाबत बैठक आहे. यासाठी राज्यातील बरेच जण आले आहेत'.

तसेच माजी खासदार राजू शेट्टी यांनी हातकणंगले लोकसभा मतदारसंघातून निवडणूक लढणार असल्याचे जाहीर केले आहे. यावर अजित पवार यांनी सावध प्रतिक्रिया दिली आहे. 'राजू शेट्टी यांनी आगामी लोकसभा निवडणुकीबाबत घोषणा केली आहे. आता कोण म्हणतंय इतके उभे करणार, कोण म्हणतय तितके उभे करणार. कोण म्हणतं एकटं उभं राहणार, आता हे प्रत्येकाचे म्हणणे आहे'.

काही मंदिरात तोकडे कपड्यावर बंदी घातली आहे. यावर भाष्य करताना अजित पवार म्हणाले, ' वर्षानुवर्षे जसे कपडे परिधान केले जातात. तसेच कपडे आणि गणवेश परिधान करावेत. आता मंदिरात कोणते कपडे घालावे? आता परराज्यातील कोणी लुंगी घालून आलं तर, आपण त्यांना येऊ देणार नाही का? फक्त तोकडे कपडे कोणी घालून येऊ नये'.