पुण्यातील अजित पवार गटाच्या महिला नेत्या रुपाली ठोंबरे यांना तातडीने रुग्णालयात दाखल करण्यात आलं आहे. रुग्णालयात दाखल केल्यानंतर रुपाली ठोंबरे यांनी सोशल मीडियावर पोस्ट करत त्यांच्या प्रकृतीविषयी माहिती दिली आहे. निवडणुकीत झालेल्या दगदग आणि धावपळीनंतर रुग्णालयात दाखल झाले असल्याची ठोंबरे यांनी माहिती दिली. 100 हत्तीचे बळ घेऊन तुमची बहीण ताकदीने उभी राहील, असा विश्वास देखील ठोंबरे यांनी सोशल मीडियावर पोस्ट करत व्यक्त केला आहे.

रुपाली ठोंबरे पाटील या पुणे महापालिकेत दोन प्रभागातून निवडणुकीच्या मैदानात उतरल्या होत्या. पुण्यातील निवडणूक राष्ट्रवादी काँग्रेस आणि भाजपने प्रतिष्ठेची केली होती. अजित पवार या निवडणुकीसाठी पुण्यात महिनाभर ठाण मांडून बसले होते. तर भाजपचे केंद्रीय मंत्री मुरलीधर मोहोळ यांनी भाजपसाठी मोठी फिल्डिंग लावली होती.

या निवडणुकीत रुपाली पाटील यांनी दोन प्रभागातून निवडणूक लढली. मात्र, दोन्ही प्रभागातून रुपाली पाटील ठोंबरे यांना पराभवाला सामोरे जावं लागलं. निवडणुकीत निकालाच्या दिवशी मतमोजणीदरम्यान रुपाली पाटील ठोंबरे यांची निवडणूक अधिकाऱ्यांसोबत बाचाबाची झाल्याचंही समोर आलं.

निवडणूक पार पडल्यानंतर रुपाली ठोंबरे आजारी पडल्या आहेत. त्यामुळे रुपाली पाटील ठोंबरे यांना रुग्णालयात दाखल करण्यात आलं आहे. रुग्णालयात दाखल केल्यानंतर रुपाली ठोंबरे पाटील यांनी पोस्ट करत माहिती दिली.

रुपाली ठोंबरे पाटील म्हणाल्या की, 'थोडा आराम,आरोग्याची काळजी. पुण्यात दोन प्रभागात निवडणुकीच्या प्रचारात,मतमोजणी दिवशी प्रक्रियेत प्रचंड धावपळीत,दगदग झाली. सर्वच उमेदवारांची होत असते जरा आरोग्याची रिव्हायटर करून परत १०० हत्तीचे बळ घेऊन तुमची बहीण रूपालीताई ताकदीने उभी राहील. जगदंब जगदंब'.