Maval Rose News : जगभरातील तरुणाईला उत्कंठा लागलेला व्हॅलेंटाइन डे काही दिवसावर येऊन ठेपला आहे. या दिवशी प्रेमभावना व्यक्त करण्यासाठी गुलाबाच्या फुलांना मोठ्या प्रमाणात मागणी असते.

ही फुले पुरवण्यासाठी मावळातील गुलाब फूल उत्पादक शेतकऱ्यांची मोठी लगबग सुरू झाली आहे. मावळातील गुलाबांना विदेशात मोठी मागणी आहे. या वर्षी व्हॅलेंटाइन डेला मावळातून दहा लाख फुलांची निर्यात होणार आहे.

व्हॅलेंटाइन डेला देश-विदेशातून गुलाबाच्या फुलांना मोठी मागणी असते. या दिवसाच्या पार्श्वभूमीवर मावळातील फूल उत्पादक शेतकरी (Farmer) डिसेंबरच्या दुसऱ्या आठवड्यापासून कामाला सुरुवात करतो. सव्वीस जानेवारी ते दहा फेब्रुवारी हा जागतिक बाजारपेठेत फुलांची निर्यात होण्याचा कालावधी असतो.

या वर्षी मावळातील (Maval) गुलाबांच्या निर्यातीला सव्वीस जानेवारीला सुरुवात झाली. या वर्षी पोषक वातावरण असल्याने फुलांच्या उत्पादनवाढीबरोबर दर्जाही उत्तम आहे. औषधांवर नाहक होणारा खर्च पोषक वातावरणामुळे कमी झाला असून, उत्पादन, दर्जा चांगला असल्याने उत्पादकांमध्ये समाधानाचे वातावरण आहे.

मात्र या वर्षी विदेशी बाजारपेठेत मागणी घटल्याने शेतकऱ्यांसह उत्पादक कंपन्यांना काहीसा फटका बसणार आहे.दरम्यान या वर्षी विमान खर्च जीएसटी दरात वाढ झाली आहे. त्यामुळे गुलाब उत्पादक शेतकऱ्यात नाराजी व्यक्त केली.

फुलांची प्रतवारी देठाच्या लांबीनुसार ठरवली जाते. स्थानिक व जागतिक बाजार पेठेत 40 ते 60 सेंटीमीटर लांबीच्या फुलांना मोठी पसंती असते. या वर्षी मावळातील फुलांना प्रतवारीनुसार जागतिक बाजारपेठेत एका फुलाला 20 ते 22 रुपये, तर स्थानिक बाजारपेठेत 15 रुपये भाव मिळत आहे.

व्हॅलेंटाइन डेला मावळातील ‘डच फ्लॉवर’ प्रजातीच्या लाल रंगाच्या गुलाबाची (Rose) देशांतर्गत बाजारपेठांमध्ये सर्वाधिक मागणी असते. यावर्षी चांगल्या वातावरणामुळे फुलांचे उत्पादन आणि दर्जा उत्तम असून, फुलांच्या मागणी बरोबर भावही समाधानकारक मिळत आहे.

मात्र यावर्षी विमान खर्च आणि जीएसटी चा जादा खर्च पडल्याने यावर्षी गुलाब उत्पादक शेतकऱ्यांना भुर्दंड पडला आहे. भारतातून निर्यात होणाऱ्या फुलांचा खर्च जास्त असल्याने यावर्षी अनेक देशात फुल निर्यात झाले नसल्याने हा फटका देखील शेतकऱ्यांना बसला असल्याचे दिसून येत आहे.