मुंबई : मेट्रोच्या आरे येथील नियोजित कारशेडवरुन मोठा वाद गेल्या काही वर्षांपासून सुरु आहे. महाविकास आघाडी सरकारने या कारशेडच्या कामाला स्थगिती दिली होती. मात्र शिंदे-फडणवीस सरकारने कारशेड तिथेच उभारण्याचा निर्णय घेतला. (Mumbai News)

पर्यावरण प्रेमींचाही अडथळा राज्य सरकारला आहे. याच पर्यावरण प्रेमींविरोधात अभिनेता सुमित राघवनने एक ट्वीट करत त्यांना फालतू बोगस म्हटलं आहे. सुमित राघवन या ट्वीटमुळे ट्रोल होताना दिसत आहे. (Maharashtra News)

सुमित राघवनने एक व्हिडीओ रिट्वीट केला आहे. ज्यात फ्रेंचमधील नागरिक वातावरण बदलाबाबत आंदोलन करणाऱ्या आंदोलकांना हटवत आहेत. या ट्वीटला 'फ्रेंचचे नागरिक वातावरण बदल आंदोलकांची काळजी घेताना' असं कॅप्शन आहे. सुमीतनं हा व्हिडिओ रिट्विट करत आरे आंदोलकांबरोबरही असंच झालं पाहिजे असं म्हटलं आहे. त्यावरून नवा वाद निर्माण होऊ शकतो.

'आरे आंदोलकांसोबतही असंच झालं पाहिजे होतं. डोक्यावर चढून बसले होते हे बोगस आणि फालतू बिनकामाचे लोक. झोलाछाप' असं सुमितने आपल्या ट्वीटमध्ये लिहिलं आहे.

एका यूजरने सुमीतचा एका कार्यक्रमातील आरेविषयी बोलतानाचा सीन ट्वीट केला आहे. हा तूच आहेत ना? चाळीस पैशांसाठीच करतोय ना? असा सवाल या यूजरने विचारला आहे. या सीनमध्ये आरे जंगलातून जे बिबटे मानवी वस्तीत येतात त्याला आपणच जबाबदार असल्याचं सुमीत बोलत आहे. तर विकासाच्या नावाखाली आपण कशी जंगलांची कत्तल करतोय हे सुमीत या सीनमध्ये सांगत आहे.

आरे येथील कारशेडला विरोध करण्यासाठी शिवसेना (ठाकरे गट) सर्वात पुढे होती. आदित्य ठाकरे याबाबत वेळोवेळी आपली भूमिका मांडताना दिसले आहेत. त्यामुळे याबाबत शिवसेनेच्या नेत्यांची काय प्रतिक्रिया आहे, हे देखील पाहावं लागेल.