Pune News: लग्नाचं स्वप्न प्रत्येकच मुलगी पाहत असते. असंच स्वप्न पुण्यातील एका तरुणीने देखील पाहिलं. मात्र स्वप्न पूर्ण होण्याआधीच तरुणीला मोठा धक्का बसला. ज्या मुलाने आयुष्यभराची साथ देण्याचं वचन दिलं त्यानेच तरुणीचा घात केला. लग्नाचे वचन देत तरुणीकडून पैसे उकळण्याचा धक्कादायक प्रकार समोर आला आहे. (Latets Marathi News)

लग्नाचं वचन अन् पौशांची लूट

पुण्यातील वडगाव शेरी येथील एका २३ वर्षीय तरुणीसोबत ही घटना घडली आहे. एका तरुणाने पीडितेला लग्नाचे वचन दिले. लग्न (Marriage) करण्यासाठी सर्व तयारी झाली. आपल्या आयुष्याच्या जोडीदारावर तिनं विश्वास ठेवला. त्याने तिच्याशी शारीरिक संबंध ठेवले. मात्र आता नराधमाने आपला शब्द फिरवला आहे. त्याने लग्नाला नकार दिलाय. तसेच तरुणीकडून पैसे उकळण्याचा प्रयत्न केला आहे.

लग्न करण्यासाठी पैशांची गरज असल्याचं सांगत तरुणाने पीडितेकडून पैसे उकळले. ती त्याची वाट पाहत राहिली मात्र तो आलाच नाही. तरुण पैसे घेऊन आपल्या गावी गेला आणि त्याने तिथेच दुसऱ्या एका तरुणीसोबत साखरपुडा उरकून घेतला. तरुणीने भारती विद्यापीठ पोलिस ठाण्यात या प्रकरणी तक्रार दाखल केली आहे. तक्रारीनुसार, शुभम पायगुडे याच्यासह अन्य पाच जणांविरोधात गुन्हा दाखल करण्यात आला आहे.

दिलेल्या फिर्यादीनुसार, आरोपी शुभमने फिर्यादी तरुणीला लग्नाचे वचन दिले होते. कात्रज येथील एका हॉटेलमध्ये तरुणीसोबत जबरदस्तीने शारीरिक संबंध ठेवले शिवाय लग्न करण्याच्या बहाण्याने तिच्याकडून एक लाख रुपये उकळले. शुभमच्या भावाने त्या दोघांच्या प्रेमसंबंधाबाबत घरी सांगितले असता शुभमच्या कुटुंबीयांनी फिर्यादी तरुणीला शिवीगाळ केली. शिवाय शुभमचा दुसऱ्या तरुणीसोबत साखरपुडा केला. याचा जाब विचारण्यासाठी फिर्यादी तरुणी गेल्यानंतर तिला धमकवण्यात आले. पोलीस या प्रकरणी अधिक तपास करत आहेत.