मेट्रो प्रवाशांसाठी गुड न्यूज! आता मेट्रो ३ मार्गिकेवर प्रवाशांना लोकलप्रमाणे दैनंदिन प्रवाशांसाठी मासिक पास सुविधा अधिकृतपणे सुरू करण्यात आली आहे. मासिक पास सुविधा २८ नोव्हेंबरपासून प्रवाशांसाठी सुरु करण्यात आली आहे. मेट्रो कनेक्ट-3 अॅपवरून हे पास खरेदी करता येणार असून यामुळे प्रवाशांना मासिक पास योजनांमध्ये पैशांची मोठी बचत होणार आहे.

मुंबईच्या आरे ते कफ परेड दरम्यान धावणाऱ्या भुयारी मेट्रो ३ मार्गिकेवर २८ नोव्हेंबरपासून म्हणजेच काल पासून दैनंदिन प्रवाशांसाठी मासिक पासची सेवा सुरु करण्यात आली आहे. नव्या योजनेनुसार प्रवाशांना दरमहा ६० ट्रिप पासवर १५ टक्के सवलत मिळणार आहे, तर ४५ ट्रिप पासवर १० टक्के सवलत देण्यात येणार आहे. या सुविधेमुळे नोकरदार वर्गाला सर्वात जास्त फायदा होणार आहे.

विशेष म्हणजे पास खरेदी प्रक्रिया अतिशय सोपी आणि पूर्णपणे डिजिटल आहे. मेट्रो-3 ही देशातील पहिली अशी मेट्रो व्यवस्था आहे जिथे मोबाइल अॅपद्वारे मासिक पासची सुविधा देण्यात आली आहे. आतापर्यंत दिव्यांग प्रवाशांसाठीच सवलतीची योजना सुरू करण्यात आली होती. पण आता सर्वसामान्य प्रवाशांसाठी देखील नियमित प्रवास अधिक स्वस्त आणि सोयीस्कर करण्याची पावले उचलण्यात आली आहेत.

एमएमआरसीएने सांगितले की, दररोजचं तिकीट काढण्याचा त्रास टाळण्यासाठी आणि प्रवास अधिक किफायतशीर करण्यासाठी ही योजना सुरू करण्यात आली आहे. दररोज लाईन मध्ये उभं राहण्याचा त्रास आता संपावा आणि डिजिटल पद्धतीने झटपट व्यवहार व्हावा हा या योजनेचा मुख्य हेतू आहे