पुण्यातून धक्कदायक बातमी समोर आली आहे. शहरातील पिंपरी चिंचवड भागात पाण्याच्या टाकीत पडून एका महिलेचा दुर्दैवी मृत्यू झाला. धक्कदायक म्हणजे काही दिवसांवर या महिलेच्या मुलाचं लग्न येऊन ठेपलं होत. मात्र महिलेच्या जाण्याने तिच्या कुटुंबियांवर दुःखाचा डोंगर कोसळला आहे. मृत महिलेचं नाव आशा संजय गवळी (वर्षे ५२) असं आहे. या घटनेने परिसरातुन हळहळ व्यक्त केली जात आहे.

मिळालेल्या माहितीनुसार, पुण्यातील पिंपरी चिंचवडमध्ये रहिवाशी असलेल्या आशा संजय गवळी या आज सकाळी पिण्याचं पाणी भरण्यासाठी गेल्या होत्या. त्या दरम्यान त्यांचा तोल जाऊन त्या पाण्याच्या टाकीत पडल्या. या दुर्घटनेत आशा यांचा मृत्यू झाला. या घटनेनंतर आशा यांच्या कुटुंबीयांनी अग्निशमन दलाला पाचारण केले.

अग्निशमन दलाने माहिती मिळाल्याक्षणी तातडीने धाव घेत आशा यांचं घर गाठलं. पिंपरी चिंचवड महापालिकेच्या अग्निशमन दलाने आशा गवळी यांचा मृतदेह पाण्याच्या टाकी बाहेर काढून शवविच्छेदन अहवालासाठी मृतदेह वाय सी एम हॉस्पिटल मध्ये पाठवला आहे. आशा यांच्या घरी मुलाची लगीन घाई सुरु होती.

येत्या ४ नोव्हेंबरला आशा यांच्या घरी त्यांच्या मुलाचं लग्नसोहळा आयोजित करण्यात आला होता. मात्र वरमाई म्हणून मिरवण्याचं स्वप्न पाहणाऱ्या आशा यांच्या अपघाती निधनाने कुटुंबियांवर दुःखाचा डोंगर कोसळला आहे. तसेच आईच्या जाण्याने मुलाचं मन हादरलं आहे. या घटनेने परिसरात शोककळा पसरली आहे.