सचिन गाड, मुंबई

Mumbai News: मुंबईतल्या वर्सोवामध्ये (Versova) राहणाऱ्या एका मॉडेलने लव्ह जिहादचा दावा केला आहे. 22 वर्षीय मॉडेलने अभिनय आणि मॉडेलिंगचे धडे देणाऱ्यावर बलात्काराचा आरोप लावला आहे. तसंच, धर्म बदलून लग्नासाठी जबरदस्ती केल्याचा आरोप देखील तिने केला आहे. याप्रकरणी तन्वीर खानविरोधात वर्सोवा पोलीस ठाण्यात (Versova Police Station) बलात्काराचा गुन्हा दाखल करण्यात आला आहे.

मिळालेल्या माहितीनुसार, मुळची झारखंडच्या रांचीची असलेल्या या मॉडेलने लव्ह जिहादचा दावा केला आहे. मॉडलिंग कपंनीचा संचालक तन्वीर अख्तर खानविरोधात तिने अनेक गंभीर आरोप केले आहेत. तन्वीर खानने आपले नाव यश सांगत मला फसवले आणि लव्ह जिहादची शिकार बनवले. तन्वीरने तिला सतत धर्म बदलून लग्न करण्यासाठी जबरदस्ती केली, असा आरोप या मॉडेलने केला आहे.

पीडित मॉडेल आणि तन्वीर खान यांची 2021 पासून ओळख आहे. या मॉडेलने आरोप केला आहे की, 'मार्च 2021 मध्ये गुंगीची औषध देऊन तन्वीरने तिचे आपत्तीजनक फोटो काढले. हे फोटो व्हायरल करण्याची धमकी देऊन त्याने तिच्यावर अनेक वेळा जबरदस्तीने शारीरिक संबंध प्रस्थापित केले. धर्म बदलून लग्न करण्यासाठी दबाव टाकण्यासाठी त्याने हे फोटो माझ्या आई आणि भावाला पाठवले.'

मॉडेलने सोशल मीडियावर व्हिडिओ शेअर करत सांगितले की, तन्वीरच्या वागणुकीला कंटाळून तिने रांची सोडून मुंबई गाठली. पण तन्वीरने तिचा पाठलाग करणे सोडले नाही. तन्वीर देखील मुंबईत आला आणि त्याने तिला धर्म परिवर्तन करुन लग्न करण्यासाठी दबाव टाकला. शेवटी या त्रासाला कंटाळून तिने वर्सोवा पोलीस ठाण्यात तक्रार दाखल केली.' दरम्यान तन्वीरने मॉडेलच्या आरोपांचे खंडन केले आहे. त्याने उलट मॉडेलवरच फ्रॉड केल्याचा आरोप केला आहे.