पुण्यात काळ संध्याकाळी नवले पुलावर भीषण अपघात झाला. या अपघातानंतर कंटेनरला आग लागली. या दुर्दैवी घटनेत एकूण ८ जणांचा मृत्यू झाला, तर १५ जण गंभीररीत्या जखमी झाले. या घटनेनंतर पुण्यात आणखी एक भीषण अपघाताचा थरार पाहायला मिळाला आहे. आळंदीहुन भिमाशंकरला दर्शनासाठी निघालेल्या भाविकांची पिकअप गाडी उलटली. दुचाकीस्वाराने भाविकांच्या गाडीला कट मारल्याने हा अपघात झाला असल्याचे म्हटले जात आहे. या घटनेत एकूण १७ जण जखमी झाले असून त्यातील ३ जण गंभीर जखमी झाले आहेत.

मिळालेल्या माहितीनुसार, आंबेगाव तालुक्यातील घोडेगाव ते श्री क्षेत्र भीमाशंकर रस्त्यावर असणाऱ्या पोखरी घाटाजवळ गुरुवार दिनांक १३ नोव्हेंबर रोजी सायंकाळी मंठा (जालना) येथील भाविकांना घेऊन जाणारे पिकअप वाहन अपघातग्रस्त झाले. दुचाकीस्वाराला वाचवण्याच्या प्रयत्नात वाहन उलटल्याची माहिती मिळाली. अपघातानंतर घोडेगाव पोलिसांनी घटनास्थळी भेट देऊन पाहणी केली.

या अपघातात एकूण १७ जण जखमी झाले असून त्यांना उपचारासाठी उपजिल्हा रुग्णालय मंचर येथे आणण्यात आले. त्यापैकी १४ जणांना किरकोळ दुखापती तर ३ जणांना गंभीर दुखापती झाल्या आहेत. जखमींमध्ये शंकर ठाकरे (वर्षे २२), पंचकुला दरडे (वर्षे ६५), जनाबाई गोटे (वर्षे ५०), लीलावती मोटे (वर्षे ६५), शशिकला वायाळ (वर्षे ५५), वर्षा काळे (वर्षे २४), श्रावणी काळे (वर्षे ५), सुवर्णा (वर्षे ३७), पृत्वीराज वायाळ (वर्षे १४), पार्वती वरकड (वर्षे ६५), महादेवी वारकड (वर्षे ६५), इंदूबाई (वर्षे ५५), सविता जाधव (वर्षे ३९), ईश्वरी बोरकर (वर्षे १०), गोदावरी शेंगडे (वर्षे ७५), ऊर्मिला धाणेकर (वर्षे ३८) आणि शोभा चव्हाण (वर्षे ३०) यांचा समावेश आहे.

तसेच गंभीर जखमींमध्ये गणेश मोरे (वर्षे६५), शशिकला वायाळ (वर्षे५५) आणि एक अज्ञात व्यक्तीचा समावेश आहे. जखमींवर उपजिल्हा रुग्णालय मंचर येथे उपचार सुरु असून डॉ. प्रिया पडोळे, डॉ. कुलदिप कठाळे, डॉ. साहिल टाके, डॉ. स्नेहल बोंबले आणि डॉ. विवेकानंद फसाले यांच्या पथकाने उपचार सुरु केले आहेत. अपघातग्रस्तांना तातडीने मदत मिळाल्यामुळे मोठी जीवितहानी टळली. दरम्यान लागोपाठ घडलेल्या या अपघाताच्या घटना भीषण असून रस्ते अपघाताचं प्रमाण राज्यात वाढल्याचं चित्र पाहायला मिळत आहे.