Shocking : महिला असल्याचं भासवून तरुणाशी चॅटिंग, मारहाण करून लुटले; मनसे तालुकाध्यक्षासह युट्युबर, तडीपार गुंडाचा प्रताप

सोशल मीडियाने शाळकरी मुलांपासून ते अगदी वयोवृद्धांपर्यंतच्या नेटकऱ्यांना भुरळ घातली आहे. मात्र त्याचा अतिरेक झाला किंवा त्याच्या माया जाळ मध्ये आणखी गुंतत गेलो तर फार हानिकारक ठरू शकत. अशाच प्रकारची धक्कादायक घटना साताऱ्यातील फलटण येथे घडली आहे. बनावट इंस्टाग्राम अकाउंट वरून महिला असल्याचे भासवून फलटण येथील युवकाला चॅटींग द्वारे एका ठिकाणी बोलावण्यात आले. त्यानंतर तीन जणांनी मारहाण करत त्या तरुणाला लुटल्याचा प्रकार समोर आला आहे. यानंतर काही तासात पोलिसांनी लुटारूंना बेड्या ठोकल्या आहेत. अटक केलेल्यांमध्ये युट्युबर, सातारा जिल्ह्यातून तडीपार असलेला संशयित आणि धक्कदायक म्हणजे मनसे तालुकाध्यक्षाचा हात असल्याचे उघड झाले आहे.

मिळालेल्या माहितीनुसार, साताऱ्यातील फलटण तालुक्यात एका ३५ वर्षीय युवकासोबत तीन तरुणांनी बनावट इंस्टाग्राम अकाऊंटवरून महिला बोलत असल्याचं भासवून चॅटिंग केली. यानंतर काही दिवसांनी या तीन तरुणांनी पीडित युवकाला एका अज्ञात स्थळी बोलावण्याचा घाट रचला. त्यानुसार चॅटींग द्वारे या युवकाला हल्लेखोर तरुणांनी वीर धरण परिसरात बोलावून घेतलं.

पीडित तरुण हल्लेखोरांच्या जाळ्यात फसला. हल्लेखोरांनी पीडित तरुणाला मारहाण केली. येवढ्यावरच न थांबता या तिघांनी मारहाण करत तरुणाला लुटलं. यानंतर संबंधित युवकाने शिरवळ पोलीस ठाण्यात याबाबतची तक्रार दिली. तक्रारीनंतर पोलिसांनी तापाची चक्रे वेगाने फिरवली. पोलिसांनी या तिघांनाही बेड्या ठोकल्या.

अटक केलेल्यांपैकी युट्युबर किरण मोरे, सातारा जिल्ह्यातून तडीपार असलेला संशयित विशाल जाधव आणि मनसे तालुकाध्यक्ष इरफान शेख यांचा समावेश आहे.या घटनेची नोंद शिरवळ पोलीस ठाण्यात करण्यात आली आहे. तसेच आरोपींकडून याआधीही असे प्रकार घडले आहेत. त्यामुळे पोलिसांनी अशा प्रकारे अजून कोणाची तक्रार असल्यास पोलीस ठाण्याशी संपर्क साधण्याचे आवाहन केले आहे.