अहमदनगर : नागवडे कारखान्याकडे गेल्या वर्षीच्या हंगामात गेलेल्या ऊस बिलाची एफआरपीनुसारची अंतिम रक्कम प्रतिटन १४४.४० रुपयांप्रमाणे आज (सोमवारी) बँकेत ऊस उत्पादकांच्या खात्यावर वर्ग होणार असल्याची माहिती कारखान्याचे अध्यक्ष राजेंद्र नागवडे यांनी दिली.

पत्रकात नागवडे म्हणाले, की गेल्या गळीत हंगामात कारखान्याने सात लाख दोन हजार पाचशे मेट्रिक टन उसाचे गाळप केले. या हंगामात कारखान्याने यापूर्वी दोन टप्प्यांत दोन हजार तीनशे रुपये प्रतिटनाप्रमाणे बिले अदा केली आहेत. एफआरपीनुसार आता अंतिम दर काढला आहे. The Nagwade factory deposited the sugarcane payment in the bank

नागवडे म्हणाले, दोन वर्षांपूर्वी राज्यातील ४५ साखर कारखाने बंद होते. त्यामुळे त्यापुढच्या गळीत हंगामातील एफआरपी निश्चिती करण्यासाठी राज्य शासनाने साखर आयुक्तांच्या अध्यक्षतेखाली एक अभ्यास समिती स्थापन केली होती. सदर समितीने कारखान्यांचे गाळप, उत्पादन खर्च, साखरेचा उतारा, ऊस तोडणी, वाहतूक खर्च आदी बाबींचा अभ्यास करून शासनास अहवाल सादर केला. त्यानुसार नागवडे कारखान्याची एफआरपी रक्कम दोन हजार ४४४ रुपये ४० पैसे प्रतिमेट्रिक टन एवढे निश्चित करण्यात आली. त्याप्रमाणे नागवडे कारखान्याकडून दहा कोटी १४ लाखांची रक्कम उद्या वर्ग होईल.

दोन वर्षांपूर्वी नागवडे कारखाना बंद असताना व सहवीजनिर्मिती प्रकल्पाचे काम केले असतानाही कारखान्याने जिल्ह्यात दोन नंबरचा भाव दिलेला आहे. कारखान्याच्या सहवीजनिर्मिती प्रकल्पाकरिता घेतलेल्या कर्जाचा हप्ता व्याजासहित परतफेड केलेला आहे. दिवाळीत सभासदांना प्रत्येकी दहा किलो साखर वीस रुपये प्रतिकिलो प्रमाणे व कामगारांना पाच किलो साखर सवलतीच्या दराने वाटप करण्यात येणार असल्याचेही नागवडे म्हणाले. The Nagwade factory deposited the sugarcane payment in the bank

नागवडे म्हणाले, यंदाचा गळीत हंगाम सुरू करण्यासाठी यंत्रसामग्री दुरुस्तीची सर्व कामे झाली आहेत. बॉयलर अग्निप्रदीपन कार्यक्रम झाला आहे. १५ ऑक्‍टोबरदरम्यान कारखान्याचे गाळप सुरू करण्याची तयारी झाली आहे. कारखाना ऊस भावाबाबत कायम आघाडीवर राहिला आहे. त्यामुळे ऊस उत्पादक व कारखाना व्यवस्थापनात विश्वासाचे नाते निर्माण झाले आहे.