Beed News In Marathi :

बीडमधून धुलीवंदनाच्या दिवशीच अतिशय दुर्देवी घटना समोर आली आहे. बीडच्या आष्टी तालुक्यातील सुलेमान देवळा गावात धक्कादायक घटना घडली आहे. या गावात वायरला हात लागल्याने शॉक लागून २६ वर्षीय तरुणाचा मृत्यू झाला आहे. या घटनेने गावात शोककळा पसरली आहे. (Latest Marathi News)

मिळालेल्या माहितीनुसार, धुलीवंदनाच्या दिवशी बीडच्या आष्टी तालुक्यातील सुलेमान देवळा गावात दुर्देवी घटना घडली. घरातील अंघोळीच्या बाथरूमजवळ कट झालेल्या वायरला हात लागल्याने शॉक लागून 26 वर्षीय तरुणाचा मृत्यू झाला.

महेश दादासाहेब तोरडमल असे मृत तरुणाचे नाव आहे. दरम्यान, महेश यांच्या पश्चात पत्नी मोहिनी, मुलगी, वृद्ध आई-वडील असा परिवार आहे. या घटनेने सुलेमान देवळा आणि पंचक्रोशीत हळहळ व्यक्त होत आहे.

जालन्यात मायलेकांचा शेततळ्यात बुडून मृत्यू

जालन्यात शेततळ्यात बुडून मायलेकाचा दुर्दैवी मृत्यू झाल्याची घटना घडली. समाधान मानिक वानखेडे आणि आणि सुमित्रा मानिक वानखेडे या दोघांचा बुडून मृत्यू झाला आहे. या घटनेने वानखेडे कुटुंबावर शोककळा पसरली आहे.

नेमकं काय घडलं?

समाधान आणि त्याची आई हे दोघे सकाळच्या सुमारास शेतात गेले होते. दुपार होऊनही परतले नसल्याने नातेवाईकांनी शोधाशोध सुरु केली. मात्र, त्यांना कुठेही आढळले नाही. काही वेळानंतर नातेवाईकांना शेततळ्यात काही तरी तरंगताना दिसले. त्यावरून शोध घेतला. तेव्हा दोघांचे मृतदेह आढळले. यानंतर नातेवाईकांनी एकच आक्रोश केला. या घटनेमुळे परिसरात एकच हळहळ व्यक्त केली जात आहे.