नागपूर - नैराश्याने ग्रासलेल्या पोलीस कर्मचाऱ्याने आत्महत्या केल्याची धक्कादायक घटने समोर आली आहे. पोलीस (Police) वसाहतीमधील घरात गळफास घेऊन पोलिसाने आत्महत्या केली. किरण सलामे असे आत्महत्या केलेल्या 30 वर्षीय पोलीस कर्मचाऱ्याचे नाव आहे. सतत येणाऱ्या संकटामुळं नैराश्यातून आत्महत्या केल्याचे सुसाईड नोट मध्ये नमूद करण्यात आले आहे. जून मध्ये होणारे लग्न तुटल्याने ते नैराश्यात होते अशी माहिती समोर आली आहे.

हे देखील पाहा -

दरम्यान, आपल्या आत्महत्येस कुणालाही जबाबदार धरु नका, असा उल्लेख सुसाईड नोटमध्ये करण्यात आला आहे. किरण सलामे यांनी आत्महत्या केल्याने नागपूर पोलीस दलात एकच खळबळ उडाली. किरण हे मूळचा कोंढाळी येथील रहिवासी. 2014 मध्ये ते शहर पोलीस दलात रुजू झाले. गेल्या एक वर्षापासून ते धरमपेठ पोलीस ठाण्यात कार्यरत होते. ते धरमपेठ परिसरातील पोलीस वसाहतीत आई आणि छोट्या भावासह राहत होते.

शनिवारी रात्री 10.30 च्या सुमारास किरण आपल्या खोलीमध्ये झोपायला गेले. रविवारी सकाळी आईने त्यांना आवाज दिला. मात्र दार आतून बंद होते. वारंवार आवाज देऊनही किरण प्रतिसाद देत नसल्याने आईने शेजाऱ्यांना सांगितले. शेजारच्या पोलीस कर्मचाऱ्यांनी वरच्या भागातून डोकावले असता किरण गळफास लावलेल्या अवस्थेत दिसले. हे पाहून पोलीस कर्मचाऱ्यांसह सगळ्यांच मोठा धक्का बसला.

Edited By - Shivani Tichkule