पती आणि मुलाच्या मृत्यूनंतर सासरच्यांनी एका विधवा महिलेची तब्बल एक लाख वीस हजार रुपयांना गुजरातमध्ये विक्री केली. त्या ठिकाणी संबंधित व्यक्तीने तिचे दोन वर्षे शोषण केलं. मुलगा जन्मल्यानंतर तिला गावी आणून सोडण्यात आले. यानंतर तिनं थेट पोलीस
ठाणे गाठले. ही धक्कादायक घटना यवतमाळ जिल्ह्यातील आर्णी पोलीस ठाण्याच्या हद्दीत घडली असून, सध्या पोलिसांकडून पुढील तपास सुरू आहे.

पीडित महिला यवतमाळच्या आर्णी तालुक्यातील रहिवासी आहे. पती आणि एका मुलाच्या मृत्यूनंतर ती आपल्या दुसऱ्या मुलगा व मुलीसह सासरच्यांकडे राहत होती. महिलेची आर्थिक स्थिती हालाखीची होती. त्यामुळे तिच्या नणंद आणि नणंदेच्या नवऱ्यानं तिला रोजगार मिळवून देण्याचे आमिष दाखवले. तसेच मध्यप्रदेशात नेले. मात्र, तिथून तिला गुजरातमधील पोपट चौसाने नावाच्या व्यक्तीला विकण्यात आले.

त्या महिलेची सुमारे १ लाख २० हजार रूपयात विक्री करण्यात आली. त्या व्यक्तीनं सुमारे दोन वर्षे तिचे लैंगिक शोषण केले. या संपूर्ण प्रकरणात पीडित महिलेच्या सासू, सासरच्या दुसऱ्या पतीसह नणंद, नंदई आणि दिर यांच्यावर गुन्हा दाखल करण्यात आला आहे. याशिवाय पोपट चौसाने यालाही आरोपी करण्यात आलं आहे.

२०२३ साली पीडित महिलेच्या आई-वडिलांनी त्यांची मुलगी आणि नातवंडांच्या बेपत्ता झाल्याची तक्रार दाखल केली होती. त्या अनुषंगाने आर्णी पोलिसांनी तपास सुरु केला. संबंधित महिला गावीच असल्याची माहिती त्यांना मिळाली. चौकशीत सर्व प्रकार उघड झाला. यावरून पोलिसांनी सहा जणांविरोधात गुन्हा दाखल केला असून, त्यातील चार आरोपींना अटक करण्यात आली आहे. दरम्यान, या घटनेनंतर परिसरात खळबळ उडाली आहे.