संजय राठोड, साम टीव्ही, प्रतिनिधी

Yavatmal : यवतमाळमधून एक धक्कादायक घटना समोर आली आहे. यवतमाळ जिल्ह्याच्या महागाव तालुक्यातील माळकिन्ही या गावामध्ये सख्ख्या भावांमध्ये घडलेल्या भीषण घटनेने गाव हादरले आहे. मानसिक असंतुलित असल्याचा संशयित लहान भावाने स्वतःच्या मोठ्या भावाचा शेतातच निर्दयपणे जीव घेतल्याने परिसरात एकच खळबळ उडाली.

आरोपी प्रदीप अशोक रिंगे (वय ३० वर्ष रा. माळकिनी ता. महागाव) याने रात्री अकराच्या सुमारास त्याचा मोठा भाऊ मृतक निलेश अशोक रिंगे (वय ३५ वर्ष) याच्या डोक्यावर, तोंडावर बांबूने काठीने मारहाण केली. गंभीर जखमी झालेल्या निलेशचा जागेवरच मृत्यू झाला. आरोपी प्रदीपला पोलिसांनी ताब्यात घेतले आहे. तर निलेशचा मृतदेह सोना ग्रामीण रुग्णालयात पाठवण्यात आला आहे.

आरोपी प्रदीप गेल्या काही काळापासून मानसिक आजाराने ग्रस्त असल्याची चर्चा घटनेनंतर दबक्या आवाजात सुरू आहे. अचानक झालेल्या रागाच्या भरात त्याने हातात बांबूची जाड काठी घेतली व शेतात काम करीत असलेल्या मोठ्या भावावर तुटून पडला. त्याने मृतक निलेशच्या डोक्यावर व तोंडावर बेछूट प्रहार केले. काही क्षणांतच निलेश गंभीर जखमी झाला व जमिनीवर कोसळून त्याचा जागीच मृत्यू झाला.

घटनेनंतर शेताजवळील शेजारी व गावकरी घटनास्थळी धावले. मात्र तोपर्यंत निलेशचा मृत्यू झाला होता. दरम्यान, घटनेची माहिती मिळताच महागाव पोलिस ठाण्याचे पथक तातडीने घटनास्थळी दाखल झाले. पोलिसांनी आरोपीला ताब्यात घेत गावातून अटक केली. याप्रकरणी महागाव पोलिसांनी गुन्हा दाखल करून पुढील तपास सुरू केला आहे. या घटनेनंतर माळकिन्ही गावात शोककळा पसरली आहे. दिवसा-ढवळ्या सख्ख्या भावानेच भावाचा जीव घेतल्याच्या घटनेमुळे नागरिकांमध्ये भीती व हळहळ व्यक्त केली जात आहे. या घटनेमुळे कुटुंबावर दुःखाचा डोंगर कोसळला आहे.