Satara Crime News: साताऱ्यामध्ये (Satara) गव्याच्या हल्ल्यामध्ये एका महिलेचा दुर्दैवी मृत्यू झाल्याची घटना समोर आली आहे. शेतामध्ये काम करत असताना या महिलेवर गव्याने हल्ला (bison attack) केला. या हल्ल्यात गंभीर जखमी झालेल्या महिलेचा उपचारादरम्यान मृत्यू झाला. या घटनेमुळे एकच खळबळ उडाली आहे.

मिळालेल्या माहितीनुसार, साताऱ्याच्या पाटण तालुक्यातील रिसवड गावात ही घटना घडली आहे. गव्याचा हल्ल्यामध्ये एका महिलेचा मृत्यू झाला. हिराबाई गोपीनाथ पवार (वय 42) असं मृत महिलेचे नाव आहे. हिराबाई या आपल्या शेतामध्ये काम करत होत्या. त्याचवेळी गव्याने त्यांच्यावर हल्ला केला. या हल्ल्यामध्ये हिराबाई गंभीर जखमी झाल्या. त्यांच्या पाठीवर गंभीर जखमा झाल्या होत्या.

गव्याच्या हल्ल्यानंतर रक्ताच्या थारोळ्यामध्ये पडलेल्या हिराबाई यांना त्यांच्या नातेवाईकांनी तात्काळ रुग्णालयात उपचारासाठी नेले. उपचारादरम्यान हिराबाई यांचा मृत्यू झाला आहे. वनविभागाच्या हलगर्जीपणामुळे हिराबाई यांचा मृत्यू झाल्याचा आरोप त्यांच्या नातेवाईकांनी केला आहे. साताऱ्याच्या या परिसरात दिवसेंदिवस वन्य प्राण्यांच्या हल्ल्याच्या घटना वाढत चालल्या आहेत. गव्याच्या हल्लेत महिलेचा मृत्यू झाल्याच्या या घटनेमुळे नागरिकांमध्ये भीतीचे वातावरण परसरले आहे.

दरम्यान, सांगली जिल्ह्यातल्या मणदूर येथे आज सकाळी गव्याने एका व्यक्तीवर हल्ला केला होता. अशोक विष्णू सोनार हे गव्याच्या हल्ल्यात गंभीर जखमी झाले आहेत. वारणा डाव्या कालव्याजवळ काळंबा मंदराजवळ गव्याने त्यांच्यावर हल्ला केला. जखमी अशोक सोनार यांना मणदूर येथील प्राथमिक आरोग्य केंद्रावर उपचार करण्यात आले. पण प्रकृती गंभीर असल्यामुळे त्यांना पुढील उपचारासाठी कराडला हलवण्यात आले आहे. या घटनेमुळे मणदूर येथील नागरिकांमध्ये भीतीचे वातावरण आहे.