विधानपरिषदेच्या निवडणुकीत महायुतीचे सर्व उमेदवार विजयी झाले. मात्र सर्वाधिक चर्चा आहे ती माजी मंत्री पंकजा मुंडेंच्या विजयाची. पंकजा काही पहिल्यांदा आमदार झाल्या नाहीत. मात्र तरी त्यांच्या विजयाची एवढी चर्चा का रंगलीय? तर त्याला कारणही तसंच आहे. कारण पंकजा मुंडे तब्बल 5 वर्षांनंतर विधीमंडळात प्रवेश करणार आहेत. विजय झाल्यानंतर पंकजांनाही या 5 वर्षांच्या कार्यकाळाचा उल्लेख करणं टाळता आलं नाही.

पंकजा मुंडे यांचा राजकीय प्रवास?

पंकजा मुंडे 2009 ते 2019 म्हणजे 10 वर्ष परळीच्या आमदार होत्या. मात्र 2019च्या निवडणुकीत त्यांचा त्यांचेच भाऊ धनंजय मुंडे यांनी पराभव केला. त्यानंतर पंकजा मुंडेंची थेट राज्याबाहेर रवानगी झाली. त्यांच्याकडे मध्य प्रदेशच्या सहप्रभारीपदाची जबाबदारी देण्यात आली. त्यानंतर त्यांना पाच वर्षांनी थेट बीडमधून लोकसभेच्या मैदानात उतरवलं गेलं. मात्र त्यांचा परभव झाला.

महायुतीत अजित पवारांच्या राष्ट्रवादीचा समावेश झाल्यामुळे परळीतून धनंजय मुंडे यांचीच उमेदवारी पक्की असल्यामुळे पंकजा मुंडेंना थेट मतदारसंघ शोधण्यापासून नव्यानं सुरूवात करावी लागते की काय अशा चर्चा रंगू लागल्या होत्या. त्यामुळेच की काय त्यांच्या लोकसभेतल्या पराभवानंतर बीड जिल्ह्यातल्या त्यांच्या कार्यकर्त्यांनं आत्महत्याही केली होती.

मात्र विधानसभेपूर्वीच विधानपरिषदेची निवडणूक लागली आणि पंकजा यांचा पाच वर्षांचा विधीमंडळातला विजनवास अखेर संपला. त्यांची बहिण प्रितम मुंडे यांनाही विजयानंतर अश्रूंना आवरता आलं नाही.

पंकजा मुंडे आता आमदार झाल्या आहेत. आणि याचवेळी मंत्रिमंडळ विस्ताराच्याही चर्चा सुरू झाल्या आहेत. लाडकी बहिण योजना राबवणा-या सरकारमध्ये भाजपकडून कोणतीही महिला मंत्रिपदावर नाही. त्यामुळे ऐन विधानसभा निवडणुकीच्या तोंडावर मंत्रिमंडळ विस्तार झाला तर पंकजा मुंडेंना लगेचच प्रमोशन मिळणार का याबाबत आता उत्सुकता आहे.