विधानसभा निवडणूक तोंडावर आलेली असताना ज्या आमदारांची उमेदवारी धोक्यात आहे त्यांना पक्षांतराचे वेध लागले आहेत. त्याच पार्श्वभूमीवर काँग्रेसचे आमदार शिंदे गटाच्या वाटेवर असल्याचा हालचाली सुरू झाल्या आहेत. .काँग्रेसचे इगतपुरीचे आमदार हिरामण खोसकर आणि देगलूरचे जितेश अंतापूरकरांनी वर्षावर जाऊन शिंदेंची भेट घेतली.

विधान परिषद निवडणुकीत काँग्रेस आमदारांनी क्रॉस वोटींग केल्याचा आरोप करण्यात आला होता. यात प्रामुख्यानं जितेश अंतापुरकर आणि हिरामण खोसकरांच्या नावाचा समावेश होता. त्यामुळे विधानसभेच्या तोंडावर या दोघांवर कारावईचीही शक्यता आहे. त्यामुळेच हे दोघे पक्षांतराची चाचपणी करत असल्याची चर्चा आहे. जितेश अंतापूरकर आणि हिरामण खोसकरांची राजकीय पार्श्वभूमी काय आहे, हे जाणून घेऊ...

जितेश अंतापूरकर

जितेश अंतापूरकर वडिलांच्या निधनानंतर पोटनिवडणुकीत नांदेडच्या देगलूरमधून विधानसभेवर निवडणून आले. अंतापूरकर हे खासदार अशोक चव्हाणांचे निकटवर्तीय असल्याचं बोललं जातं. त्यांच्यावर विधान परिषद निवडणुकीत क्रॉस व्होटिंगचा आरोप देखील आहे.

हिरामण खोसकर

हिरामण खोसकर हे 2019 मध्ये इगतपुरीतून काँग्रेसच्या तिकिटावर निवडणून आले. ते नाशिक जिल्ह्यातील काँग्रेसचे एकमेव आमदार आहेत. आदिवासी बहुल मतदारसंघाचं प्रतिनिधित्व ते करतात. त्यांच्यावरही विधानपरिषद निवडणुकीत क्रॉस व्होटिंगचा आरोप आहे.

लोकसभा निवडणुकीत मोठं यश मिळाल्यामुळे काँग्रेसमध्ये इच्छुकांची मोठी गर्दी झालीय. मात्र तरीही काँग्रेस आमदार पक्षांतराच्या तयारीत आहेत. लाडकी बहीण योजनेच्या लोकप्रियतेचं श्रेय घेण्यात सर्वात आघाडीवर मुख्यमंत्री एकनाथ शिंदे आहेत. त्यामुळेच की काय काँग्रेस आमदारांनाही शिंदेंची भुरळ पडली असून ते हाती धनुष्य घेण्याच्या तयारीत असल्याची चर्चा सुरू आहे.