'रावण' हा रामायणातील 'व्हिलन', आणि खलपुरूष अशीच या पात्राची सर्वांच्या मनात प्रतिमा आहे. सितेचं अपहरण करणाऱ्या रावणाभोवतीच रामायणाचं मध्यांतर आणि क्लायमॅक्सही फिरतो. वाईट शक्तींचं प्रतिक असलेल्या याच रावणाचं दसऱ्याला दहन केल्या जातं. मात्र, अकोला जिल्ह्यातील एका गावात चक्क याच रावणाची पुजा केली जाते. हे रावणपुजक गाव कोणतं आहे? साडेतीनशे वर्षांची या गावाची रावणमुर्ती पुजेची परंपरा नेमके आहे तरी काय? पाहूयात.

महाराष्ट्रातील अकोला जिल्ह्यात ५० किलोमीटरवर असलेलं पातूर तालूक्यातील 'सांगोळा'. या गावाच्या अगदी सुरूवातीलाच एका मंदिरवजा चौथऱ्यावर रावणाची एक अतिशय सुंदर, रेखीव मूर्ती आहे. सुमारे ३५० वर्षांची परंपरा या मूर्तीच्या आगमनाची आहे. या गावात रावणाच्या मंदिरासोबत राम, हनुमान आणि इतर देवतांची मंदिरंही आहेत.

या देवतांच्या आराधनेबरोबरच गावकरी भक्तीभावानं रावणाचाही आराधना करतात. रावणाच्या मूर्तीचं कुतूहल असल्यानं अनेक लोक या मूर्तीच्या दर्शनालाही येतात. दसऱ्याच्या दिवशी संपुर्ण गाव रावणाच्या आराधनेत रंगून जातं.

दुसरीकडे सध्याच्या परिस्थितीत महागाई, दहशतवाद, महिलांवरील अत्याचार, राष्ट्रीय एकात्मतेचे मारेकरी हेच खरे राक्षस आहेत. दरम्यान आज साडेतीन मुहूर्तांपैकी एक असलेल्या विजयादशमी निमित्त समाजातील राक्षसी वृत्तीचा नायनाट करून शुभ सुरुवात करूया.