छत्रपती संभाजीनगरमध्ये महिला व मुलींच्या सुरक्षेचा प्रश्न गंभीर होत चालला आहे. वाळूज बजाजनगरमधील गोरख वाघ चौकात मध्यरात्री घडलेल्या एका घटनेने हा मुद्दा पुन्हा ऐरणीवर आणला आहे. आईसोबत मोमोज खाण्यासाठी गेलेल्या अल्पवयीन शाळकरी मुलीचा चार रोडरोमिओंनी पाठलाग करून छेड काढली. या असभ्य प्रकाराने घाबरलेल्या मुलीने व तिच्या आईने आरडाओरड केली.

या आवाजामुळे स्थानिक नागरिक घटनास्थळी जमा झाले व त्यांना प्रकार समजताच चौघा रोडरोमियोंना जमावाने चांगलाच चोप दिला. त्यानंतर त्यांना जवळच्या दुकानात कोंडून ठेवण्यात आले. घटनेमुळे परिसरात काही काळ तणावाचे वातावरण निर्माण झाले होते. महिला आणि मुलींच्या सुरक्षेचा प्रश्न पुन्हा चर्चेत आला आहे.

वर्दळीच्या ठिकाणीही महिलांना अशा प्रकारच्या छेडछाडीला सामोरे जावे लागत आहे. या घटनेनंतर स्थानिक नागरिकांनी महिला सुरक्षेसाठी अधिक कडक उपाययोजनांची मागणी केली आहे. घटनेनंतर पोलिसांनी घटनास्थळी पोहोचून परिस्थिती नियंत्रणात आणली. दोषींवर कठोर कारवाई केली जाईल, असे पोलिसांनी सांगितले आहे. मात्र, महिलांच्या सुरक्षेसाठी ठोस पावले उचलण्याची गरज नागरिकांकडून व्यक्त केली जात आहे.

महिला सुरक्षेचा प्रश्न केवळ या घटनेपुरता मर्यादित नाही, तर तो संपूर्ण समाजासाठी चिंतेचा विषय आहे. सार्वजनिक ठिकाणी महिलांना सुरक्षितता मिळावी यासाठी प्रशासनाने कडक उपाययोजना राबवाव्यात, अशी मागणी जोर धरत आहे. या घटनेमुळे महिलांच्या सुरक्षिततेसाठी अधिक प्रभावी पावले उचलण्याचे महत्त्व पुन्हा अधोरेखित झाले आहे.