मनोज जयस्वाल 
वाशीम : क्लासला जाण्यासाठी घरून निघालेली युवती सायकलवरून रस्ता ओलांडत होती. याच वेळी रस्त्याने आलेल्या ट्रॅव्हल्सने जोरदार धडक देत मुलीला उडविले. यात सदर युवतीचा जागीच मृत्यू झाल्याची घटना वाशीम शहरात दुपारच्या सुमारास घडली आहे. अंगाचा थरकाप उडविणारी हि घटना सीसीटीव्ही कॅमेरात कैद झाली आहे. 

वाशिम शहरात घडलेल्या या अपघातात संध्या सारसकर (वय १६) असे मृत युवतीचे नाव आहे. शहरातील लक्ष्मीबाई शाळेत दहावीच्या वर्गात शिक्षण घेत होती. दरम्यान संध्या हि दुपारच्या सुमारास क्लासला जाण्यासाठी सायकल घेऊन घरातून निघाली होती. रास्ता मोकळा असल्याने तिने सायकलवरून रस्ता ओलांडण्याचा प्रयत्न केला. मात्र याच वेळी पुसदकडे वेगाने जाणाऱ्या ट्रॅव्हल्सने जोरदार धडक देऊन सायकलला उडविले. यात युवती रस्त्यावर दूरवर फेकली गेली. यात तिचा जागीच मृत्यू झाला.  

घटना सीसीटीव्ही कॅमेरात कैद 

रस्ता ओलांडताना ट्रॅव्हल्सने दिलेल्या धडकेत संध्या हि दूरवर फेकली गेली होती. यानंतर तिच्या अंगावरून ट्रॅव्हल्सचे चाक गेले. अंगाचा थरकाप उडविणारी हि धक्कादायक घटना सीसीटीव्ही कॅमेरात कैद झाली आहे. घटनेनंतर मार्गावर मोठी गर्दी जमली होती. तर घटनेची माहिती पोलिसांना देण्यात आल्यानंतर घटनेचा पंचनामा करण्यात आला. 

पुलावरून बस कोसळली 

बार्शी जवळील बायपास येथे एसटी बस आणि दुचाकीचा अपघात झाला असून एसटी बस ओढ्याच्या पुलावरून खाली गेली. पुलावर दुचाकीस्वाराला वाचवताना चालकाचे नियंत्रण सुटल्याने बस पुलाखाली गेली. या अपघातात दुचाकीवरून दूध घेऊन जाणारा व्यक्ती गंभीर जखमी झाला असून बसमधील प्रवाशी किरकोळ जखमी झाले आहेत. तर बस पुलावरून खाली गेल्यामुळे बसचे मोठे नुकसान झाले आहे,