मनोज जयस्वाल 
वाशीम : फसवणूकीच्या गुन्ह्यात पटाईत असलेला आणि नेहमी आपला ठावठिकाणा बदलत अनेकांना गंडा घालणाऱ्याचा शोध पोलीस घेत होते. मात्र मागील एका वर्षापासून फरार असलेल्या आरोपीला रिसोड पोलिसांनी मोठ्या शिताफीने तांत्रिक व आधूनिक पध्दतीने तपास करत बुलढाणा जिल्ह्यातून ताब्यात घेतले आहे. त्याच्याकडून तीन इ स्कुटीसह साधारण १ लाख ६८ हजार रुपयांचा मुद्देमाल जप्त केला आहे. 

वाशिमच्या रिसोड पोलिसांची या महिन्यातील पाचवी दमदार कामगिरी केली आहे. परवेज युसूफ देशमूख (वय ४७) असे अटक केलेल्या आरोपीचे नाव आहे. दरम्यान रिसोड येथील एका इ मोटर्स दुकानातून परवेज देशमूख याच्यासह सादीक देशमूख व शेख तनविर शेख हारूण (सर्व रा. उर्दु प्राथमिक शाळा, राणी पार्क जळगाव जामोद, ता.जळगाव जामोद, जि. बुलडाणा) यांनी संगनमत करून फिर्यादीचे विश्वास संपादन करून फिर्यादीच्या दुकानातून ३ ई-स्कूटी रक्कम नंतर देऊ असे सांगून घेतल्या. 

ठिकाण बदलत असल्याने पडण्यात अडचण 

मात्र या स्कुटीची कोणतीही रक्कम न देता फसवणूकीने घेवून केल्या प्रकरणी ई मोटर्स विक्रेत्याने रिसोड पोलीस स्टेशन येथे गुन्हा नोंद करण्यात आला होता. सदर गुन्ह्यातील आरोपी हे फसवणूकीचे गुन्हे करण्याच्या सवईचे असून ते नेहमी आपला ठावठिकाणा बदलत असल्याने तसेच मुंबई सारख्या मोठ्या शहरामध्ये आपले अस्तित्व लपवून वास्तव्य करीत असल्याने पोलीसांना त्यांना पकडण्यास अडचणी निर्माण होत होत्या.

जळगाव जामोद येथे आला असता अटक 
तसेच आरोपी हे वेगवेगळे मोबाईल क्रमांक वापरून पोलीसांची दिशाभूल करीत होते. यावरून डीबी पथकाने सायबर सेलच्या मदतीने आरोपींचे प्रत्येक हालचालींवर बारकाईने लक्ष ठेवून तांत्रिक व आधूनिक पध्दतीने तपास केला. यानंतर परवेज देशमूख हा पोलीसांची नजर चुकवून एका दिवसासाठी जळगाव जामोद येथे आल्याची गुप्त माहिती मिळाली. या वरून १२ सप्टेंबरला सिनेस्टाईलने आरोपी परवेज युसूफ देशमूख यास जळगाव जामोद येथून मोठ्या शिताफीने पकडून अटक केली.